Retrásase'l cargu de política llingüística

El nome de Misael Fernández Porrón,
ex-alcalde de Mieres, saltó por primer vez a últimos de la otra selmana pa llevar la Dirección Xeneral de la que va
depender la Oficina de Política Llingüística, que nun va
tener quien la lleve hasta en pasando'l veranu.



L'antiguu alcalde de Mieres, Misael Fernández Porrón, ye agora la
persona que más suena pa llevar la Dirección Xeneral de
Política Llíngüística y Promoción Cultural.
Anque nun primer momentu falose de que podía seguir nel cargu Ana
Navarro, la negativa de l'antigua directora llevó estes selamanes a
qu'apaeciesen dellos nomes de xente allegao al PSOE, casu de Villaverde y agora
Porrón, persona vinculada tradicionalmente al SOMA y al ala guerrista
dientro del PSOE asturianu.



Mientres la Dirección Xeneral entovía sigue colingando, la persona que
s'encargue de la Oficina de Promoción Llingüística ta
entovía por definir, y parez que nun va sabese quien lu ocupa hasta en
pasando'l veranu. Rafael Palacios, dirixente del Bloque por Asturies, esplicó a Asturies.com que'l retrasu n'escoyer al titular de la oficina ye porque entovía tan peñerándose posibles candidatos y que quier ponese nel cargu a "la persona más fayadiza". En cuantes al hipotéticu nombramientu de Misael Porrón, el representante de la organización asturianista esplicó que nun tenía munchu conocimientu y nun quixo confirmar nin desmentir tala posibilidá.