Retecal podría cambiar d'amu

L'accionariáu de Retecal, la operadora de cable y telecomunicaciones ximielga de l'asturiana Telecable, podría camudar enforma d'equí en pocos díes. Ello ye que l'operador de telecomunicaciones ONO ta acabante de facer una ufierta pa facese col 51% de les acciones de la operadora de cable de Castiella-Llión, que furne d'accesu a tv por cable y internet de banda ancho a más de 70.000 clientes a la otra parte del cordal. Esta ufierta supondría la salida del accionariau de Retecal de Caja España, qu'anguaño tien el 28% de los títulos de la empresa, anque tamién el de más inversores, qu'entovía nun se sabe quien van ser, hasta llegar a esi 51% del accionariau. Xunta los accionistes mayoritarios, en Retecal tan asitiaos un garapiellu d'inversores pequeños, ente los que ta la empresa asturiana ALSA, que tien anguaño'l 5% de la operadora. De momentu, nun se sabe si la operación va prosperar, pero la ufierta ta fecha.

Retecal constituyose en 1997 como la concesionaria de cable pa Castiella-Llión, teniendo d'aquella un accionariau nel que la parte mayoritaria repartiose a partes asemeyaes ente Hidrocantábrico, Caja España y el Grupu Begar, del empresariu José Luis Ulibarri. La falta de financiación pa poder cablear un territoriu tan enorme como'l de Castiella-Llión y el pocu sofitu dende les instituciones (Caja España y el gobiernu autonómicu nunca nun contrataron servicios cola empresa) obligaron va agora un añu a entamar un enanchamientu de capital nel qu'Hidrocantábrico participó xunta Caja España.

D'aquella llegó a especulase con una hipotética fusión ente les dos operadores d'un llau y del otru del cordal, y tampoco nun se descartaba la posible igua d'un grupu de telecomunicaciones pal terciu noroeste del estáu enxertando a la operadora gallega "R". Agora, el camín parez que ye distintu, y la entrada d'ONO supondría un apueste del sector bancariu español y de multinacionales estranxeres por metese nesti mercáu: El Bancu Santander tien el 20% d'ONO, mientres que General Electric y Ferrovial tienen otra tayada importante del so accionariáu. ONO opera nel mercáu del cable cola marca Cableuropa, que yá tien presencia en 13 provincies del estáu, y presídela Eugenio Galdón, antiguu directivu de la Cope. Como cosa curioso, nel conseyu d'alministración d'ONO ta ún de los nomes más ubícuos de la vida empresarial española, l'ex-presidente Leopoldo Calvo Sotelo.