Retecal pasa a manes d'ONO

Confirmando lo qu'adelantáremos anteayeri, la operadora de cable Ono ta acabante de facese col 56% de Retecal, la compañía que furne de serviciu de cable en Castiella-Llión. Les acciones que va remanar d'agora en p'alantre ONO van ser les de Caja España y Grupo Bégar, que lleven a cambiu na operación el 7,2% de los títulos d'ONO. Sicasí, ONO nun da por rematada la operación, en cuantes que quier facese col 100% del capital de la empresa, colo qu'abre la posibilidá de vender al restu d'accionistes, que son Hidrocantábrico, Caja Segovia, Caja Ávila, Empresa Fernández, Gesprocable, ALSA y Zener Comunicaciones.

L'alquisición de Retecal ye'l primer gran movimientu nel sector estatal del cable dende que se dieren les llicencies en 1998. D'aquella, Retecal, concesionaria pa Castiella-Llión, ñació, baxo'l paragües accionarial d'Hidroeléctrica del Cantábrico, como una compañía hermana de l'asturiana Telecable, cola que compartía bien de soluciones técniques y dellos servicios, casu de la oficina d'atención al cliente, qu'atiende dende Valladolid a los veceros de les dos compañíes. La posibilidá, de la qu'entovía se falaba va un añu, de qu'Hidrocantábrico quixere crear un gran grupu de comunicaciones fusionando Retecal y Telecable desapaez agora al mesmu tiempu qu'ONO pasa a ser el primer grupu de telecomunicaciones del Estáu per delantre d'AUNA, compañía cola que se ruxe per ende que podría acabar fusionándose.