Resuélvese'l misteriu d'Antoine de Saint-Exupery

Dempués de sesenta años de misteriu, un equipu atopó esta selmana enfrente de Marsella lo que queda del avión col que s'estrelló l'escritor francés Antoine de Saint-Exupery nos últimos díes de la segunda guerra mundial.

L'autor y aviador desapaeciere n'estrañes circunstancies el 31 de xunetu de 1944 cuando pilotaba un avión durante una misión de reconocimientu sobre'l Mediterráneu a l'altura de Marsella. L'avión del autor de "vuelu de nueche" llevaba buscándose nel llugar dende 1998, cuando salieron a flote oxetos personales del desapaecíu y anque de mano hebo delles duldes sobre si lo que satopare yera de verdá l'avión de Saint Exupery, una plancha col númberu de matrícula de la nave confirmó l'afayu, rematando una busca de sesenta años tres d'un personaxe qu'apaez nel panorama de la lliteratura francesa de la primer metada del sieglu XX como una voz independiente y heterodoxa y que se proyecta sobre la segunda a la manera d'un románticu modernu, como s'entesaca de la tristura de la so obra más famosa, "El Principín" y de la so estampa d'aviador solitariu en vuelos de llargu recorríu que la muerte s'encargó d'afitar.

Saint Exupery dexó una obra curtia como la propia vida d'elli (morrió con 44 años) pero xusto un añu enantes de desapaecer nel mar espublizó "Le petit Prince" la obra que lu asitió na lliteratura universal. Nella, un guaje que ye príncipe d'un pequeñu planeta nel que nun vive naide más qu'elli sal pel universu alantre a conocer a los humanos. Desencantáu colo qu'atopa, el Principín acaba abandonando la tierra. Anque aceptada universalmente como un llibru empobináu a un públicu infantil poles munches personalizaciones d'animales y plantes qu'hai nella y pol fechu de que'l protagonista seya un neñu d'ocho años, les llectures que xorrasquen nesa apariencia cenciella asoleyen llectures dacuando mui escures sobre'l mensaxe final del llibru afonden muncho nos sos posibles significaos. Asina, los críticos de "El Principín" muévense ente dos estremos, per un llau los que ven na obra una defensa de los valores humanistes y del sentimientu contra'l materialismu y la interpretación interesada de toles coses y per otru los que la interpreten como un llibru de desencantu hacia'l mundu y ven nel final de la obra la declaración d'un suicida - el Principín marcha de la tierra gracies a la mordedura d'una culiebra-.

Precisamente esi enclín suicida que munchos quieren ver nel llibru podría tener que ver cola estraña muerte de Saint Exupery, anque la idea de que l'escritor estrellare l'aparatu a costafecha pa matase ye la que tien menos créditu . Que se sepa, nadie echó abaxo l'avión del escritor, que bien pudo tener una avería o bien pudo cayer al mar por un galdíu del pilotu, qu'acumulaba naquellos díes munches hores de vuelu.

"El Principín" que nun tien res que ver nin por tema nin por estilu col restu de la obra de Saint-Exupery, tien l'honor de ser la obra más lleida na historia de la lliteratura francesa y la más traducida a otros idiomes. La historia del Príncipe de les estrelles ye tamién la obra de ficción más vendida de tola historia n'asturianu. Ello ye que la versión n'asturianu de "El Principín" qu'iguare Xosé Lluis García Arias va yá pela cuarta edición y lleva vendíos más de cinco mil exemplares.