Regalu de cumpleaños de L'Aguañaz

La discográfica "L'Aguañaz" cumple 10 años y celébralo cola edición d'un discu compilatoriu d'esta última década.

Nesti aniversariu ye'l que cumple'l que fai los regalos. El regalu de parte de "L'Aguañaz" pa los aficionaos a la música asturiana ye esti "10 años d'independencia" que presenta la historia reciente de la casa de discos y de la música asturiana. Son 19 temes que quieren ser una pequeña muestra de grupos y estilos que grabaron con la discográfica asturiana a lo llargo d'estos 10 años. Pero'l discu nun ye solo un estoyu de cantares grabaos n'otros discos, en cuantes qu'hai cantares inéditos, remezcles o debús. Por exemplu Anabel Santiago grabó pa esti discu una tonada siguiendo l'estilu del so discu. "Batulax" estrénase nun discu y "Skanda" tamién apaez con un cantar que nun grabaren. Ente los cantares inéditos destaca "Danza d'Avilés" de "Balandrán" que grabaron especialmente pa esti discu, anque ensin intención de volver a retomar la formación. Tamién rescampla'l debú en solitario d'Ambás, cantante de "N'Arba". El de Grao grabó un aguilandu tradicional al que'l productor Sergio Rodríguez amestó programaciones pa tener a la fin un resultáu sorprendente.

Ente los remixes topamos a "N'Arba" col "Inda ya ceu" y a "Corquiéu" col "Lo sueltu d'Ayer". Estes remezcles encóntense principalmente en remocicar les igües orixinales nes programaciones. El restu de los cantares son de Jorge Méndez, "Skitarna", "Ú?", "La Cigua", "Cave Canem", "Guti", "La Col.lá Propinde", "Cambaral", "Folkgando", "Avientu", "Os Diplomáticos" y por supuestu "Dixebra". 19 propuestes musicales que permiten ver qué ye lo que s'avanzó na música asturiana, y qué ye lo que se perdió, porque ye interesante decatase de que munchos de los grupos d'esti discu yá nun furrulen.