Refuga oficial a otru barcu basura

Dende la catástrofe del Prestige, los
puertos asturianos lleven recibiendo barcos con historiales más o menos
escurosy que fadríen meyor serviciu nel desguace que navegando, pero lo
que ta por pasar enfrente de la nuestra costa y muncho más cerca de la gallega
yá ye tan escandaloso que, acordies a la llei nueva, prebada'l 21 d'ochobre, nun tendría derechu
a entrar a puertu en tola UE.

El barcu de marres llámase Geroi Sevacstopolya, y ye de construcción noruega. Con 24 años enriba, esti petroleru monocascu carreta dende'l bálticu a Singapur un cargamentu de 50.000 tonelaes de fuel y lleva en cascu les marques d'un accidente que tuvo con otru barcu nel 2001. Anque les autoridaes del puertu de Rotterdam decidieron dalu de pasu pa la navegación depués d'unes reparaciones, un barcu d'estes característiques nunca nun podría entrar a cargar o descargar en puertos de la UE, pero la llexislación comunitario nun diz que nun diz res en casu de que la nave cargare'l petróleu en paises de fuera de la UE. Al gobiernu español falto-y tiempu pa dar anuncia de que nun va dexar al barcu metese n'agua de competencia española, y alvirtió que diba mandar un barcu de guerra a la posición del Geroi Secvastopoliya pa escoltalu y asegurase de que nun entra nes 200 milles de competencia estatal.

Otramiente, la UE pidió-y oficialmente al gobiernu letón que nun dexare salir de puertu al barcu, ello depués de que'l comisariu del Gobiernu, Francisco Uría, esplicare'l martes na Eurocámara que con esti barcu yá van 21 qu'España va echando de la zona au fundió'l Prestige. Casu de pasar algo col barcu, les corrientes submarines, que circulen agora n'inviernu d'oeste a este pela costa del Cantábricu, espardiríen la carga per tola costa dende Finisterre a Euskadi. Greenpeace denunció esta posibilidá y tamién el fechu de que la llexislación marítimo internacional sigue ensin apautar un réxime de responsabilidaes al contratar arcos d'estes característiques, ello arriendes de que nun ta acelerándose la retirada d'estos barcos, que namás suponen un 4% de la flota petrolera.