Reconocimientu pa la pita pinta asturiana

La Dirección Xeneral de Ganadería unvió-y ayeri al Ministeriu d'Agricultura, Pesca y Alimentación tola documentación preciso pa consiguir el reconocimientu oficial de la Pita Pinta Asturiana como raza autóctona. Casu d'aprebala'l Comité Nacional de Races, la pita asturiana entraría al escoyíu garapiellu nel que yá tan l'Asturiana de los Valles y del monte, la Oveya Xalda, la Cabra Bermeya y l'Asturcón.


Según los datos del Principáu y l'Asociación de Criadores, la Pita Pinta val pa güevos y pa carne, esistiendo anguaño 38 criadores daos d'alta y cerca de 500 exemplares. Esta raza, que como otres tuvo cerca de desapaecer, vien recuperándose dende los años 80, cuando'l biólogu Rafael Eguiño se metió a trabayar por ella y apautó los patrones xenéticos d'esta raza de tipu Atlánticu que presenta variedaes de color en negro, roxo y blanco.


Nun hai referencies lliteraries nin anuncia histórica sobre l'orixe y espardimientu d'esta raza n'Asturies, pero hai grabaos d'elles n'horros de Courias (Cangas) y del Pieloro (Carreño). Los más de los piteros onde s'atoparon animales de pita pinta taben alloñaos de grandes ciudaes y separtaos dafechu de circuitos comerciales avícoles, lo qu'afañó qu'estos animales nun tuvieren cruzaos con otres especies. La declaración como raza autóctona de la pita pinta tamién salvaría la diferencia d'Asturies con Galicia o Euskadi, que yá tienen especies avícoles reconocíes como autóctones.