Reacciones n'Asturies al documentu de la Conferencia Episcopal

El "Directoriu de la Pastoral Familiar de la Ilesia d'España" qu'asoleyó ayeri la Conferencia Episcopal ta armando un espolín bien gordu ente los colectivos de defensa de la muyer y los d'homosexuales. Nes 250 fueyes del documentu oficial, la Conferencia episcopal venceya la violencia contra les muyeres cola llibertá sexual que vieno de la supuesta "revolución sexual". Pa los obispos españoles, la familia ta en crisis, y ello ye pola presencia, cada vegada con más influyencia, duna "ideoloxía perniciosa" que se debe, ente otres coses, a la supuesta collaboración ente políticos, medios de comunicación y "lobbys homosexuales" por da-yos preerencia a les reivindicaciones d'estos colectivos en cuenta d'atender a "los verdaderos problemes de la violencia familiar"

L'Institutu Asturianu de la Muyer mandó esta mañana un comunicáu oficial nel que diz que coles sos declaraciones la Conferencia Episcopal demuestra que nin conoz el fenómenu de la violencia de xéneru. Pal Institutu la llibertá sexual, el derechu al divorciu o la posibilidá d'optar ente modelos de familia distintos son llogros de la llucha de les propies muyeres que contribúin a facer un modelu social más igualitariu nel que les muyeres entamen a exercer los sos derechos. L'organismu oficial da-yos la vuelta a les consideraciones de los obispos al pescanciar que precisamente gracies a esta nueva llibertá tan conociéndose fenómenos de violencia que primero nunca nun trescendíen del ámbitu priváu. L'Institutu de la Muyer llamenta que la Conferencia Episcopal tea tan desaverada de lo que ye'l paecer mayoritariu de la sociedá, hasta de los mesmos católicos.

Muncho más duru foi'l comunicáu de Xente Gai Astur. L'asociación de defensa de los derechos de les persones homosexuales convoca a una concentración el xueves día 5 a les 8 de la tarde enfrente del Auditoriu Príncipe Felipe d'Uviéu baxo'l llema "Contra la Homofobia de la Xerarquía Católica". El comunicáu de Xega diz que "Yá-y valió" a la ilesia católica de querer asustar a la sociedá colos hipotéticos peligros que supón el reconocimientu de les pareyes de persones del mesmu sexu. "Nin tenemos culpa de que la sociedá tea avieyando nin vamos francer la seguridá social nin vamos destruir nengún modelu de familia". El colectivu homosexual defende, contra la condena eclesial, l'adopción de rapacinos por families de persones del mesmu sexu y diz que tan cansos de que se quiera poner a les rellaciones homosexuales como "inversión antinatural"