Reacciones al pieslle d'Egunkaria

Ayeri lL'Audiencia Nacional d'España mandaba trancar el diariu n'euskera Egunkaria y detener a 10 persones venceyaes al periódicu por collaboración o pertenencia a la banda ETA. Yera la segunda vegada, en democracia, que s'echaba'l piesllu a un mediu de comunicación, y anque la midida seya "cautelar" obliga a cinco años de suspensión, lo que significa prácticamente la defunción del mediu. Los trabayadores y l'equipu de redacción que quedó yá tienen na cai Egunero mediu que van intentar caltener como sustitutu del periódicu orixinal. Anque la noticia seya l'apaición d'esti nuevu periódicu, que ñaz col sofitu del Gobiernu vascu en forma de propaganda oficial, nun dexen de llamar l'atención les reacciones de condena que tan apaeciendo en bien de medios de comunicación a la orde xudicial. Aparte de la condena de medios vascos nacionalistes como Gara o Deia, periódicos venceyaos a grandes medios de comunicación espublicen güi editoriales contra la orde de trancar Egunkaria. En Cataluña, los medios en catalán firmaron güei esti manifiestu conxuntu en que diz qu'Egunkaria siempre tuvo una llinia editorial democrática y que pesllar un mediu de comunicación ye un ataque al derechu a la llibertá d'espresión. El manifiestu fírmenlu El Periódico de Cataluña y el diario "El Nou" dos periódicos enxertos en grupos de comunicación, grupu Z y Grupu Moll, que tamién tienen periódicos n'Asturies, La Voz de Asturias y La Nueva España respectivamente. El País y El Mundo tamién espublizaron editoriales condenando'l pieslle polo menos hasta que s'esclarien esactamente les razones del mesmu. L'espublizar una entrevista cola dirección d'ETA na que supuestamente s'indicaba ún de los oxetivos p'asesinar de la banda ye ún de los argumentos que se dan pa xustificar el pieslle d'Egunkaria. Nun dexa de venir a cuentu que Pedro J.Ramirez, actual director de El Mundo-y ficiere en 1.987 una entrevista a la dirección d'ETA pal desapaecíu Diario 16.