Raquel Sánchez retrasa a mayu del 2023 l’apertura de la variante de Payares

|
Raquel Sánchez Jiménez y Adrián Barbón

N’abril, en Ribeseya, la ministra Raquel Sánchez Jiménez ratificaba’l primer trimestre del 2023 como fecha d’apertura de la variante de Payares. El martes, na visita d’Adrián Barbón al Ministeriu de Tresportes, Movilidá y Axenda Urbana, confirmó al presidente una nueva pa la llegada de la velocidá alta: mayu d’esi mesmu añu.

“La gran demanda nestos momentos n’Asturies”, como la calificó’l socialista, torna a sufrir un retrasu nuevu. Una fecha, dos meses más tarde de lo que la ministra vien diciendo dende qu’entamara a trabayar el tren de prueba nos túneles de la variante en setiembre, que, sicasí, foi celebrada por Barbón.

Xunto a la llegada a Asturies de la velocidá alta ferriovaria, el presidente trató otros munchos temes nel alcuentru más importante, según avanzó, de los cinco que tuvo ente’l llunes y ayeri en Madrid con ministros, y pal que se fixo acompañar de viceconseyeru d’Infraestructures, Jorge García López. Nel alcuentru con Sánchez Jiménez repasaron l’estáu de delles obres y cuestiones, y recibieron la confirmación de que’l Conseyu de Ministros va aprobar en xunetu l’aplicación de bonificaciones pal peaxe del Güerna.

Tamién anunció que la finalización próxima de la ponte de La Barrosa siguirá un calendariu con plazos p’acelerar l’autovía del suroccidente (A-63), vertebral pa esa rexón, y la intención d’entainar colos trabayos de construcción del tercer carril de la autopista Y. Otra manera, Barbón aprovechó’l momentu p’adelantar la espublización próxima nel BOPA de la convocatoria del Bonu Alquiler, dotada con 6,6 millones, pa favorecer l’accesu a la vivienda de la mocedá.

Comisión de siguimientu col ministeriu

Na primer selmana de xunetu va entamase’l primer aconceyamientu d’una comisión de siguimientu encargada de supervisar el cumplimientu de les inversiones previstes n’infraestructures n’Asturies. “Nos cuatro primeros meses del 2022 executóse un 21 por cientu más que nos cuatro primeros meses del 2021”, apuntó a la salida de la entrevista con Sánachez Jiménez el presidente, qu’añadio que “como queremos ser estremadamente esixentes nel cumplimientu d’esos datos, vamos facelo de forma mensual. Tolos meses va haber una xunta de tipu téunicu del propiu Ministeriu de Tresportes como del Gobiernu d’Asturies, al traviés de la Conseyería de Mediu Rural y Cohesión Territorial, y en particular la parte d’Infraestructures, pa garantizar esi cumplimientu”.

Na semeya, Sánchez Jiménez y Barbón.

Contador Estadistiques