Ramón D’Andrés estudia víes de cooperación con L.lena pa la promoción del asturianu

El director de la Oficina de Política Llingüística, Ramón D`Andrés, visitó ayeri'l conceyu de L.lena. El motivu oficial de la visita yera facer un analís de les posibles llinies de cooperación ente'l Principáu y l'Ayuntamientu na promoción del usu del asturianu, anque la visita tien una repercusión mas grande por facese nun a la selmana dempués d'un plenu nel Ayuntamientu en que'l portavoz del PP llamó terroristes a los demás grupos políticos por querer aprobar un reglamentu d'usu del asturianu.

Ún de los oxetivos de la Oficina que dirixe d'Andrés ye'l d'ayudar a los conceyos que propongan iniciatives destinaes a promover l'usu público del asturianu, casu del Serviciu de Normalización del Asturianu de L.lena. Na entrevista ente D'Andrés y la conceyala de Cultura, Paz García, nun s'apautaron númberos pa la collaboración económica ente la Oficina de la Conseyería y el Serviciu del Conceyu, pero sí que se faló de dellos proyectos que van facese esti añu, ente los que se sorrayaron la rotulación n'asturianu en dellos pueblos del conceyu, que ta yá a entamar, y la rotulación d'edificios públicos, pa la que va pidise subvención a la Conseyería de Cultura. Los edificios a los que se mandaría esa ayuda sedríen la Casa d'alcuentru de muyeres, l'Hotel d'asociaciones y quiciás el teatru Vital Aza.

Na entrevista Ramón d'Andrés sorrayó la "importancia de que les autoridaes tengan en cuenta que l'usu del asturianu ye un serviciu a la ciudadanía". D'Andrés, que sofitó l'aprobación del reglamentu, tamién faló sobre los socesos del plenu de va ocho díes, y llamó l'atención sobre la postura del PP de L.lena, sobre la que dixo que "l'usu del asturianu ye un asuntu d'interés común y hai que tener cuidáu y nun plantegar rellaciones falses, como la del asturianu col terrorismu; toi convencíu amás de que nel PP hai persones que piensen mui distinto a eso"

Xunta la conceyala de cultura Paz García tuvieron tamién tuvieron na entrevista col director de política Llingüística Montserrat Álvarez Areces (PSOE), Agripino Pérez (IX-BA) y Salvador Riera (URAS). Los conceyales del equipu de gobiernu, que-yos resquema l'actitú del grupu popular, dieron anuncia de qu'agora que'l testu ta en periodu d'alegaciones van volver a poner los puntos que se quitaron de la redacción orixinal del reglamentu por suxerencia del PP na comisión de cultura.