“Queremos que’l seminariu sía una ventana d’información sobre los aspeutos positivos de la oficialidá”, afirma Galán

El seminariu ‘Oficialidá, el camín constitucional de futuru pal asturianu’ va vivir una segunda edición los díes 17 y 18 de mayu. A pocos díes de les eleiciones, en plena campaña eleutoral del 26-M, Iniciativa pol Asturianu quier que "sía una ventana d’información sobre los aspeutos positivos de la oficialidá” énte los ataques que se preven hacia l’idioma, "como pudimos ver esti vienres".

El presidente d’Iniciativa pol Asturianu punxo’l ramu'l sábadu a les XXVI Chornadas d'As Luengas d'Aragón, qu’entama l’Asociación Cultural Nogará Religada cola charra ‘Xestión cultural n’Asturies: Creando cultura al traviés de los medios’. “Los medios de comunicación tienen un papel esencial na normalización de les llingües porque son una forma de mantener vivu l’idioma y que la sociedá vea como dalgo normal el poder sentir un informativu o poder lleer una crónica deportiva na to propia llingua. Tamién ye una manera de da-y prestixu al idioma”, afirmó.

“Una de les meyores maneres de xustificar los medios de comunicación públicos ye afitar y aumentar la presencia de conteníos na llingua propia de los territorios. Esti argumentu a favor de la presencia de llingües como l’aragonés o l’asturianu nos medios públicos ye importante porque estes llingües marquen la diferencia de conteníos nuna televisión pública”, añadió Galán, qu’adelantó en Zaragoza que’l papel de los medios na normalización del asturianu va ser ún de los temes que va tratar una edición nueva del seminariu ‘Oficialidá, el camín constitucional de futuru pal asturianu’, celebráu en marzu del añu pasáu con un ésitu grande n’Uviéu.

Ésti va desendolcase los díes 17 y 18 de mayu baxo’l mesmu títulu y va contar “con un alderique” al respeuto, confirmó. “Queremos que’l seminariu sía una ventana d’información sobre los aspeutos positivos de la oficialidá” que pueda servir d’ayuda al votante, previniendo una campaña eleutoral enllena d’ataques al idioma, “como pudimos vivir el vienres pasáu col comienzu de la campaña actual”, apuntó’l presidente d’Iniciativa pol Asturianu a Asturies.com en referencia a les crítiques de Pablo Casado (PP) y Santiago Abascal (VOX) al asturianu nes sos visites al país.

L’Edificiu Históricu de la Universidá d’Uviéu va acoyer otra vegada una serie d’interveciones que va inaugurar tamién el rector Santiago García Granda. Ex altos cargos “de tolos colores” van protagonizar la primer charra, a la que van siguir delles sobre’l funcionariáu o’l llabor de los servicios de normalización llingüística, ente otros asuntos.

“Queremos reflexonar sobre esperiencies d’ésitu real en normalización llingüística”, adelanta Galán sobre esta segunda edición del seminariu.

Oficialidá del asturianu y del aragonés

Na so intervención en Zaragoza, el periodista y escritor xixonés tamién s’alcordó de la llingua aragonesa. “Esta mañana tamos n’Aragón recordando qu’equí tamién se fala una llingua, l’aragonés, que como l’asturianu alcuéntrase nuna situación de desigualdá al nun contar estos idiomes col estatus d’oficialidá. La falta d’oficialidá del aragonés y del asturianu ye anticonstitucional y ye una situación que tien que correxise. Vamos trabayar xuntos nel camín de la normalidá y de la oficialidá d’estes dos llingües”, afirmó Galán.

Na semeya, Galán nun momentu de la charra del sábadu en Zaragoza.