Queipo pide al Gobiernu de Barbón que faiga la reforma de la Llei d’Usu “de la mano del PP”

“El Partido Popular de Asturias ta güei nel mesmu puntu y posicionamientu que’l Partido Popular de Asturias del 1998”, afirmaba’l presidente nuevu de la formación, Álvaro Queipo, esti xueves depués d’una visita “histórica” al llar de l’Academia de la Llingua Asturiana (ALLA). El de Castropol refuga la oficialidá, pero quier ser protagonista activu na reforma prevista de la Llei d’Usu y Promoción del Asturianu.

Acompañáu polos tamién diputaos populares José Luis Costillas y Beatriz Polledo, Queipo acudió a les instalaciones académiques por invitación de la institución, representada pol presidente Xosé Antón González Riaño y pol secretariu Xosé Ramón Iglesias Cueva. “Ye la primer vez qu’una delegación d’esti nivel del Partíu Popular visita la sede de l’Academia de la Llingua Asturiana”, rescampló’l González Riaño, que lleó un “comunicáu conxuntu” que “reflexa la visión qu’ambes instituciones tenemos como resume d’esta visita y alcuentru”, lo que calificó de “puntu d’inflexón” nes sos rellaciones.

Enantes rellató que l’alcuentru consisitió en “esplicar un poco llabor’l de l’Academia, el llabor científicu, el normativizador, d’investigación, y el llabor xeneral. Falamos un poco de la estructura de funcionamientu de l’Academia, del presupuestu, del ámbitu físicu”, pa terminar cola presentación de la “propuesta que nel so momentu fiximos al Gobiernu d’Asturies de lo que podría ser la política llingüística derivada d’esi Plan de Normalización que’l Gobiernu d’Asturies habría facer”, documentu que la institución entovía nun difundió de forma pública.

“Tamién treslladamos al Partíu Popular la nuesa visión de cuál sería la nuesa visión d’una oficialidá afayada a la situación concreta d’Asturies dende’l puntu de vista sociolóxicu, sociopolíticu y sociollingüísticu”, una oficialidá que protagonizaría gran parte de les entrugues de los munchos periodistes presentes a Queipo, que na so salida del llar social de l’ALLA pa tomar un café colos responsables académicos comunicara a González Riaño la so sorpresa pola atención mediática del alcuentru. Enantes, na respuesta de la primer pregunta, sobre si quedaba atrás con esta comunicación conxunta la postura negocionista del PP sobre la realidá llingüística asturiana, el dirixente popular aprovechó pa dexar nidiu’l mensaxe que pretendía llanzar nesta rueda de prensa, dirixíu espresamente al presidente Adrián Barbón y centráu na Llei d’Usu y Promoción del Bable/Asturianu.

"Patrimoniu inmaterial d'altísimu valor"

“Son cuestiones y debates que creo que tán superaos”, respondió de primeres depués de dar agradecimientos a González Riaño, momentu nel qu’emplegó brevemente’l gallego-asturiano. “Anque ye cierto qu’esti alcuentru ye dalgo histórico, asúmolu con total normalidá. El Partido Popular no puede desarrollar su política, presentar les sos propuestes y representar a los asturianos dexando al marxe a una institución como l’Academia de la Llingua que ta reconocida ampliamente y que lleva munchos años faciendo un trabayu enorme pola conservación, la difusión, la investigación en materies llingüístiques, concretamente n’asturianu y n’eonaviego”, arrancó.

Emponderó “la voluntá qu’amosaron siempre y que siguen amosando, de caltener tou aquello que tien que ver cola política llingüística n’Asturies dientro del espaciu de los grandes consensos. Creo qu’esi ye’l mayor ésitu que tiene l’Academia de la Llingua agora mesmo y dende’l Partido Popular queremos valoralo positivamente”.

Nesti puntu declaró que “el Partido Popular reconoz a les llingües asturianes, l’asturianu y l’eonaviego, como un patrimoniu inmaterial d’altísimu valor de tolos asturianos ensin esceición, y, poro, pa nós nun ye plantegable baxo conceptu nengún, nenguna política llingüística que se faiga al traviés de la construcción de muries que separten. Nós nun vamos tar na construcción de muries ente asturianos y nun vamos utilizar dalgo tan guapo y tan propio como les llingües d’Asturies pa facer política como un arma pa llanzar al oponente”.

La referencia de la política llingüística de Marqués

Llueu de finar con esta introducción de la postura actual del PP baxo la so presidencia, y confirmando l’aconceyamientu como un alcuentru “mui positivu que será’l puntu d’entamu d’una rellación”, Queipo centróse na Llei d’Usu. “Va unos meses el Gobiernu del señor Barbón anunciaba que tenía intención d’aprobar la nueva Llei d’Usu y Promoción del Asturianu. El Partido Popular de Asturias ta güei nel mesmu puntu y posicionamientu que’l Partido Popular de Asturias del 1998. Los nuesos raigaños al rodiu la política llingüística fúndense necesariamente n’aición de gobiernu de Sergio Marqués, polo que nos sentimos non sólo autores, sinón arguyosos autores, de la llei que permitió, al nuesu entender, el desendolcu máximu hasta’l día de güei del asturianu, la so conservación y la so promoción al máximu nivel magar que la llei nunca se desarrolló posteriomente como creemos que debería facese”.

Dicho esto, fixo un “pidimientu al Gobiernu del Principáu d’Asturies, porque creemos, como cree l’Academia, que tou aquello que xira alredor de la política llingüística ha construyise en base a los consensos y nun podemos, y dende llueu nun lo fadrá’l Partido Popular”, que “énte cualquier intención de modificar o derogar p’aprobar una nueva Llei d’Usu y Promoción, que lo faiga de la mano del Partido Popular, al menos de la mano del Partido Popular. Nun puedo imaxinar un escenariu nel que’l Gobiernu busca l’apoyu circunstancial y puntual pa consiguir la mayoría xusta y necesaria, ensin qu’estes cuestiones de política llingüística reciban un ampliu consensu”.

Una norma con "munchu marxe de maniobra"

Foi nesti momentu cuando llegó la primer entruga sobre la oficialidá, a lo que Queipo respondió que “nós entendemos de la manera más amplia posible’l derecho al usu del asturianu. Queremos que cualquier asturianu que quiera facer usu de la so llingua pueda facelo con total llibertá, pero nós nun podemos apoyar que s’obligue al aprendizaxe de la llingua asturiana. Poro, nun tamos a favor de la oficialidá pero creemos qu’hai munchu trabayu por desendolcar pa la conservación, pa la promoción y pa dalgo tan xenuinu como son les llingües asturianes que pertenece a tolos asturianos y creo amás qu’arriquecen la nuesa tierra”.

“Nel 98 un Gobiernu del Partido Popular única llei pa usu y promoción del asturianu, de les llingües asturianes. Dende entós nun se dio un pasu más en materia de promoción”, siguió Queipo, qu’en momentu nengún citó al Partíu Asturianista (PAS), responsable tamién de la mesma.

“Creo que los gobiernos socesivos tuvieron la oportunidá y la responsabilidá de desendolcar reglamentariamente esa llei, que tien munchu marxe de maniobra, y nengún gobiernu s’ocupó d’ella. Sorpréndeme que’l Gobiernu fale agora de derogar una llei que ta por desendolcar pa trayer otra con conteníu que nun conocemos. Nun sé si siguen nesa idea, pero en cualquier casu, cualquier modificación o aprobación d’una llei nueva d’usu y promoción que venga a sustituyir a la del 98 ha de facese col mayor consensu posible”, insistió.

La postura de l’ALLA

González Riaño, viendo per onde diba’l debate, aprovechó pa tomar la pallabra y dexar nidia la postura de l’ALLA sobre la oficialidá. “Ye pa nós una cuestión constitucional. La previsión constitucional pa les llingües del Estáu propies de les comunidaes ye un estatus xurídicu propiu d’oficialidá. Pa nós, como Academia de la Llingua Asturiana y como institución non sólo normativa, sinón tutelar de los derechos llingüísticos, el llogru de la oficialidá y la esixencia del cumplimientu de la Constitución ye, como entenderán ustedes, una cuestión irrenunciable. Porque efeutivamente la Constitución española pue tener principios, declaraciones, planteamientos que pueden ser retóricos y difíciles de llograr, pero la oficialidá de les llingües nun ye dalgo etereu nin declaración ritual, sinón que tien una execución praútica en toles comunidaes con llingua propia reconocida”, aseguró.

“La Constitución española, nel tema llingüística, sí se reconoz en Galicia”, siguió’l caderalgu, “y nós, dende llueu, sí aspiramos, respetando la posición actual del Partíu Popular, a qu’ente los grandes partíos parllamentarios y de gobiernu n’Asturies, el Partido Popular y el PSOE, haya esi gran consensu que tien que llegar y dase nel tema de la oficialidá. Será una oficialidá qu’Asturies necesita y será nel so momentu la oficialidá que pauten les grandes fuerces polítiques”.

Al salir el términu emplegáu por Barbón de la ‘oficialidá amable’ González Riaño respondió que “cuando se fala de la oficialidá amable siempre respuendo que nosotros claro que queremos una oficialidá amable, nun va ser una oficialidá repunante. Queremos una oficialidá qu’asegure culturalmente’l valir de la llingua asturiana, que seya un elementu de vertebración, que seya un elementu d’unión como diz Queipo y non un elementu de desunión, que nun xenere muries ente los asturianos, que se lleve a cabo dende un puntu de vista efectivu, qu’asegure la llibertá llingüística, etc. Eso ye pa nós ye la oficialidá amable, non una oficialidá que xenere rechazu, agreasiva. Tien que ser una oficialidá constructiva”.

“La oficialidá ye o nun ye”

Darréu, a una entruga a Queipo d’Asturies.com, que recordaba les posiciones sobre la oficialidá de dirixentes del PP naquellos años últimos 90, momentu nel que s’aldericaba la reforma del Estatutu, y cuestionaba al presidente del partíu sobre si nun creía nuna oficialidá adaptada a la realidá sociollingüística del país ensin obligatoriedá como se refería Barbón al citar la ‘oficialidá amable’, el de Castropol dixo que “yo creo que la oficialidá ye o nun ye, y permítame que sía más claru entovía, y siguiendo colo que ta acabante de mencionar el presidente de l’Academia: creo que los que falen de cooficialidá amable son los repunantes. La oficialidá ye o nun ye”.

El popular criticó darréu la negociación de la reforma estatutaria llanzada pol PSOE. “Lo que nun pue ser ye lo qu’asocedió na llexislatura anterior. Lo que nun pue facer un políticu ye falar d’una oficialidá axetivada porque eso ye confundir a la opinión pública. Lo qu’un políticu nun ha facer nunca ye entamar un procesu falsu hacia una oficialidá axetivada de forma estraparllamentaria. Ye un insultu a Asturies y engañu a los votantes, nesti casu d’otros partíos”.

Añadió que “nun nació entovía’l ser humanu que m’esplique que ye una ‘oficialidá amable’, pero sí sé qué ye la oficialidá. Polo tanto, la oficialidá ye o nun ye. Y nós, dende llueu nesti momentu, puedo asegura-y que nun concebimos la oficialidá”.

Y pa finar, insistió en que “l’actual marcu normativu, especialmente si fuese convenientemente desendolcáu, permitiría fomentar l’usu y la conservación del asturianu. Y pa nós ési ye’l puntu nel qu’hemos tar. La oficialidá lleva consigo determinaos aspeutos que pa nós son inasumibles, como la obligatoriedá nel aprendizaxe de la llingua asturiana, y como ven nun toi llevando l’alderique a temes de costos y demás. Toi quedando no que ye fundamentalmente la idea de la propia oficialidá. La conservación del asturianu y la so permanencia ye perfeutamente compatible con un marcu llegal como l’actual, nel que desendolcando les lleis actuales pue potenciase munchísimu más. Nun hai que dir más allá”.

Na semeya, González Riaño y Queipo.