¡Que se cumpla la llei!

Depués de conocese que l'asturianu ta incluyíu nel informe de la UNESCO como una de les llingües del mundu en peligru d'estinción, los grupos políticos reprresentaos na Xunta Xeneral trataron ayeri una proposición de URAS que pidía al Gobiernu d'Asturies que se cumpliera la Llei d'Usu, faciendo un desenvolvimientu reglamentariu de la mesma.
Como persaben los nuestros llectores, esta llei lleva aprobada dende l'añu 1998, pero l'Alministración asturiana nun cumple nengún de los sos apartaos: Nin no referío a la toponimia nin a la escolarización o cenciellamente na non discriminación pol simple usu. La proposición d'URAS, que per boca del so portavoz Leonardo Verdín, calificó l'informe de la UNESCO como "güelpe na conciencia de los asturianos" aprobóse al apoyala'l PSOE, qu'aprovechó pa remembrar lo qu'ellos llamen "avances" na escolarización; anque ayeri mesmo, José Luis Montes, responsable d'Educación, dicía que la lexislación actual nun dexaba dir más p'allá del desenvolvimientu de la Llei d'Usu, faciendo un exerciciu d'amnesia política y malabarismu verbal, desque foi'l propiu PSOE el que punxo más torgues pa nun incluyir la oficialidá na pasada reforma del Estatutu, y obviando qu'hasta agora la Llei ye papel moyao hasta'l puntu de que l'Alministración yá tien más de 300 denuncies por incumplila.
Pel so llau, el grupu d'Izquierda Xunida abstúvose na votación por cuidar qu'esta Llei nun ye la solución y porque amás la proposición de la URAS nun pon plazos al Executivu, quedando too en declaraciones d'intenciones, mentes que'l PP aprovechó pa dicir qu'esto ye un exemplu más de la "plasmación" del gobiernu d'Areces, anque'l restu de declaraciones respecto a l'Informe nun tienen desperdiciu (pueden vese na portada d'ayeri d'Asturies.com).
No que sí coincidieron tolos grupos foi en llamentar l'informe, anque con conclusiones estremaes: IX pidiendo oficialidá; PP diciendo que nun cree que l'asturianu tea en peligru anque lo diga la UNESCO y PSOE diciendo que nun ye culpa d'ellos, sinón de tolos asturianos y que yá se verá si la evolución política dexa que dacuando se pueda dir más allá.