¿Qué corriente ye verde?

Si ayeri yera la empresa asturiana Electra Norte la que denunciaba a la so rival Iberdrola por facer propaganda engañoso al ufiertar "corriente verde" güei ye la prestixosa organización ecoloxista Greenpeace la que denuncia les campañes d'Iberdrola y Endesa qu'intenten atropar clientes cola promesa de da-yos "corriente verde" procedente too ello de fontes renovables.

Contra esta propaganda, Greenpeace quier llamar l'atención en que más del ochenta por cientu de la corriente que producen Iberdrola y Endesa (dos de les tres mayores compañíes eléctriques españoles) vien de les térmiques a carbón y de centrales nucleares, colo que la promesa de dar "corriente verde" esbarrumbla ella sola. Al paecer de Greenpeace, estes situaciones d'engañu danse porque les compañíes nun espliquen en recibu de la lluz d'au sal la corriente que consumimos.


Eti veranu Greenpeace echó a andar xunta otres organizaciones ecoloxistes, de
consumidores y sindicales, ente elles Adena, UXT y CCOO lacampaña "Saber pa poder escoyer" que pide que les compañíes pongan nos
recibos de que fontes d'enerxía vien la corriente que gastamos y
qué efectos contaminantes tien, una indicación que bien
podía ayudar a escoyer que compañía queremos que nos dea
serviciu, o polo menos a conocer les emisiones de CO2 de les que ye responsable
esa empresa. La campaña encóntase na esistencia d'una directiva europea del 1 de xunu del 2.003 que manda a les compañíes poner en recibu'l desglose de fontes emplegaes en dar suministru.