'Purito' Rodriguez sal reforzáu del Cuitunigru al aumentar la ventaya con Contador en seis segundos

|

Alberto Contador atacó otra vuelta a Joaquim ‘Purito’ Rodríguez nes rampes del puertu Payares y del Cuitunigru, onde ganó l’italianu Cataldo. El catalán aguantó de forma espectuacular y inclusive aumenta la ventaya col de Pinto en seis segundos.

La etapa ‘reina’ de La Vuelta tampoco nun defraudó a los aficionaos al ciclismu, que pudieron ver otru duelu per tolo alto ente’l líder Purito (Katusha) y l’aspirante Contador (Saxo Bank-Tinkoff Bank). El guión foi asemeyáu al de Los Llagos d’Enol y La Ercina, con ataques constantes del de Pinto, el primeru nes rampes últimes, les más dures, del puertu Payares –onde’l xixonés Dani Navarro (Saxo Bank-Tinkoff Bank) marcó un ritmu de xuba impresionante–, y depués nel Cuitunigru. En nengún momentu Purito dio muestres de debilidá y inclusive nel quilómetru últimu, con porcentaxes del 24 por cientu, consiguió abrir güecu col so competidor y saca-y dos segundos na llinia de meta que, cola bonificación, queden en seis pa sumar un total de 28 na xeneral. D’esta forma, el corredor catalán sal reforzáu de la cima ḷḷeniza pa estes cinco etapes últimes de La Vuelta –güei ye xornada de descansu–, quedando-y a Contador como oportunidá única p’arrampuña-y el maillot colloráu la Bola del Mundo, el sábadu.

Al igual qu’asocedió en Los Llagos, el grupu escapáu consiguió pelear pola victoria d’etapa, yá que los favoritos pa la xeneral taben más pendientes de vixilase que d’otra cosa. Ello permitió al italianu Dario Cataldo (Omega Pharma-Quickstep) y al belga Thomas De Gendt (Vacansoleil-DCM) llegar a les primeres rampes del Cuitunigru con una ventaya de 5 minutos col pelotón, suficiente pa ganar la etapa. La llucha entre los dos corredores decantóse pol italianu a falta de dos quilómetros, algamando la llinia de meta con sufrimientu poles rampes infernales de los metros últimos. Mentes, per atrás, Christopher Froome (Sky) llegaba a la cima a 2.13 d’Alejandro Valverde (Movistar), que s’asegura, salvo sorpresa, la so presencia nel podiu de Madrid. El murcianu aventaya agora al brintánicu na xeneral en 2.48.

 

Contador Estadistiques