Pumares quier más concreción sobre la oficialidá y asegura que “esperábamos más” de la propuesta de reforma

|
Adrián Pumares y Jaime Fernández-Paíno

Foro considera curtia la propuesta socialista de reforma del Estatutu d’Autonomía. “Ye una deceición, esperábamos más”, aseguró a la salida de la xunta en Presidencia al tiempu que demandaba una mayor concreción sobre la “oficialidá amable” d’Adrián Barbón.

“Llevaré esti documentu a la Comisión Direutiva de Foro Asturias p’aldericar les nueses aportaciones a una reforma qu’esperábamos más ambiciosa llueu de cuatro años d’espera”, apuntó’l secretariu xeneral del partíu, que tuvo acompañáu nel aconceyamientu por Jaime Fernández-Paíno. Esiste falta d’alcuerdu no que respeuta a los decretos-lleis, figura que’l presidente Barbón vieno anunciando como ún de los puntos importantes que quier introducir nel Estatutu depués de lo vivío na pandemia, “porque entendemos que lo relevante ye controlar y fiscalizar l’aición del Gobiernu”, apuntó Pumares, que dixo tener “rocees importantes sobre la so posible utilización”, y considérase que’l documentu aportáu pol Gobiernu ye pocu concretu.

“El Principáu ha atrevese y asumir toles competencias posibles, pero nesti documentu nun hai entovía propuestes concretes y queremos conocer de qué forma va afrontar el Gobiernu autonómicu eses posibles tresferencies”, llamentó. Tamién echó en falta una esplicación, en términos “qu’entendamos toos”, de cómo va desenvolvese esa oficialidá que toma como referencia’l modelu gallegu y recordó que la llinia colorada de Foro ta “na voluntariedá y non obligación d’usu”.

Na semeya, Pumares y Fernández-Paíno a la salida de l'aconceyamientu celebráu na tarde d'ayeri.

Contador Estadistiques