Puede llegar la segunda marea negra

Según la Delegación del Gobiernu, ayeri alcontráronse cinco manches grandes de galipote na costa asturiana, amás de les tres qu'apecieron flotando énte'l puertu d'El Musel de Xixón. Les dos mayores tan al llau del Cabu Peñes, una ye de 800 por 3 metros y la otra de cerca de 100 metros.
n'Arnao, en Castrillón, tamién na rodiada del Cabu Peñes, apaeció otra más pequeña. Tolo demás, yá más menudo, ta más pal oriente, con manches que van espardiéndose dende Llastres hasta Llanes. Colo que ta xubiendo dende Galicia, a segunda marea negra asturiana podría tar equí en dos o tres díes.

Col pilotu de l'alarma prendíu polo que pueda pasar coles manches de galipote siguen enfilando pel Cantábricu, y mientres los centros de San Xuan de Nieva y L.luarca s'esfuercen en sacar alantre los menos de 200 páxaros que siguen con vida, l'especial sobre l'accidente del Prestige na web oficial del Principáu lleva ensin actualizase dende'l día 19. Esta falta d'información institucional contrasta cola cantidá de documentos que van xubiendo al web de la Universidá d'Uviéu sobre'l Prestige, que güei ofrez un informe nel que resume l'accidente del barcu, les sos consecuencies y la evolución de la marea negra, xunta una propuesta propia pa crear abellugos llimpios nes zones afectaes que vien de la Escuela de Marina Civil, too ello con bayura de gráficos, dellos ellaboraos polos mesmos profesores de la facultá de bioloxía que caltienen a títulu particular esta web de la Universidá.