PSOEy IX asoleyen les sos diferiencies col asturianu en Llangréu

El plenu del Ayuntamientu de Llangréu vivió ayeri ún de los primeros desalcuerdos ente PSOEy IX-BPA a nivel de política municipal por culpa de la llingua asturiana cuando PSOE y PP votaron a la escontra d'una moción presentada por IX-BPAsobre política llingüística. Según esplicóa Asturies.com el conceyal d'IX-BPA Rafael Palacios, la moción que se presentó ayeri nun yera otra cosa qu'un desarrollu de les llinies xenerales del pautu de gobiernu autonómicu treslladaes al nivel y les particularidaes del conceyu, ello xunta una reconocencia esplícita de la demanda d'oficialidá por parte del conceyu.

Al paecer, según Palacios, anque la moción se presentó en tiempu y forma, nun s'enxertó nelorde del día y acabó metiéndose al plenu pol trámite d'urxencia, cosa que yá daba argumentos pa echala p'atrás en casu de que nun se quixere tratar en serio. Ello foi que'l PSOE, teóricu sociu d'IX, pidió en plenu que se retirare la moción pa poder estudiala primero na comisión que-y correspondía y asina poder llevala depués a plenu col consensu garantizáu. El representante d'IX-BPA retrucó-y al grupu socialista que'l testu yá yera de consensu en cuantes que respondía a la lletra de los alcuerdos autonómicos y que esi testu yera'l qu'había que llevar depués a la comisión que-y tocare desarrollalo. La falta d'entendimientu ente dambes agrupaciones polítiques acabó de vese clara cuando'l PSOE votó xunta'l PP, en contra de la moción. Al paecer de Palacios, que nun ve esplicación a la pinza que tan faciendo en dellos temes PP y PSOE nel gobiernu del conceyu, esta votación vien a ser una demostración de que lo que val p'Asturies nun ta val pa Llangréu, onde denuncióque l'alcuerdu IX-PSOEnun ta cumpliéndose.

Dende IX-BPA dicen que yá metieron otra vez la moción a rexistru pa que vuelva a tratase pal siguiente plenu, anque esta vegada nun va ser Rafel Palacios quien la defenda, porque'l yá ex-conceyal tuvo que dimitir, por incompatibilidá, del cargu n'Ayuntamientu pa recibir el cargu nuevu de Director del Institutu de Cooperación al Desarrollu dientro de la Conseyería de Xusticia y Asuntos Europeos