Protestes na cai contra'l PP

L'anuncia a media tarde de que la ministra d'esteriores unviare a les embaxaes una circular pidiendo que se defendiere l'autoría d'ETA nos atentaos entamó una tarde de revelaciones clave. Trés d'ello, la detención de cinco persones esta tarde, dos de nacionalidá india y trés de nacionalidá marroquí en Madrid en rellación colos atentaos d'esti xueves en Madrid destapó la caxa los truenos nes casi de tol estáu. Casi al mesmu tiempu que'l ministru Acebes comparecía énte los medios pa dar anuncia de les detenciones, énte les ses del Partíu Popular entamaron a facese concentraciones, la mayor en Madrid, onde más de 3.000 persones se concentraron en Génova protestando contra'l Gobiernu del PP pola decisión de sofitar l'ataque a Irak y sobremanera pol bloquéu y la manipulación informatives impuestes por Interior dende'l momentu de los atentaos. N'Asturies, la concentración más importante foi en Xixón, onde s'axuntaron más de 300 persones na plaza'l Parchís, onde los manifestantes cantaron conseñes como "la vuestra guerra, los nuestros muertos" "enantes de votar queremos la verdá" y "asesinos"

A les 9, una rueda de prensa del candidatu popular daba la rempuesta oficial del PP a les concentraciones: Rajoy pide a la xente qu'abandone les concentraciones y diz que va denunciar les concentraciones énte la Xunta electoral por ser midís de presión illegales y illexítimes na xornada de reflexón pa les votaciones de mañana. La Xunta Electoral Central dio-y la razón al candidatu popular y dio parte a la fiscalía por si quier entamar acciones contra unes convocatories anónimes que se ficieron al traviés de mensaxes a móviles, anque Rajoy daba por fecho que trés d'elles había partíos políticos que quería más nun nomar.

Los acontecimientos disparábense, y al mesmu tiempu, Izquierda Xunida y el Partíu socialista catalán esixíen la dimisión del ministru Acebes por faltar a la verdá y engañar a la opinión público. Mientres les televisiones internacionales daben cobertura de lo que taba pasando, Televisión Española, oxetu tamién de la protesta, camudaba la emisión que tenía preparada de mano pola película "morir en febrero" que trata'l tema de les víctimes d'ETA.