Prorroga nel concursu al meyor cantar n'Asturianu

Énte la gran cantidá de votos recibíos estos últimos díes nel concursu al meyor cantar n'asturianu d'Asturies.com espúrrese un poco la primer fase del periodu de votación, que va siguir abierta hasta mañana.

El plazu pa poder votar al meyor cantar n'asturianu del 2.003 va acabar a les 12 de la nueche del día de mañana, 6 de xineru, en cuenta de facelo a la mesma hora pero esta nueche. La razón ye qu'estos díes tan llegando munchos votos que tan faciendo cambiar delles posiciones qu'hasta agora paecíen asitiaes, y tan faciendo tamién qu'espoxiguen candidatos qu'hasta esti momentu'l públicu nun tenía en cuenta. El casu ye que Gatos del Fornu algamó estos díes el primer puestu col cantar "Brañas d'Antañu", quitando-y esta posición al tema "Fayeos de Mayo" de "Felpeyu". Pal tercer puestu sigue la pelea ente "Tejedor" con "Andolina", Anabel Santiago col so "Al son de la lluna", y "La Pongueta" de "Felpeyu". Con too y con ello, un nuevu candidatu apaeció nos caberos díes de concursu y, anque a muncha distancia, tien tola traza de dir a dar guerra, ye nada menos que Vicente Diaz que con "La canción de les piragües" púnxose al día en pocos díes y yá cuenta como "outsider" na llucha por algamar el tercer puestu del concursu.

Pa votar hasta mañana día seis namás qu'hai que dir a esta web. Remembramos qu'ente tolos participantes van rifase conxuntos de regalos apurríos polos patrocinadores del concursu, les cases de discos Fonoastur y l'Aguañaz.