Primer tesis doctoral en Mirandés

Dende Portugal lléganos una prestosa noticia nel reconocimientu del mirandés, la llingua hermana del asturianu que se fala nel nordeste portugués. Ello ye que la otra selmana presentóse na Universidá de Salamanca la
primer tesis doctoral redactada -lo menos en parte- en mirandés.

La tesis, que nun ye de filoloxía, como podría pensase, trata sobre xeografía, estudiando los recursos naturales y l'ordenamientu del territoriu mirandés, y l'autor ye'l llicenciáu y yá doctor Carlos Ferreira.

La tesis tien
650 páxines de les que 250 tan redactaes en mirandés, otres 400 en portugués y sobre 30 en castellanu, y nella l'usu del mirandés vien a cuentu de qu'un de los volumes de la investigación encóntase na toponimia y la microtoponimia de Miranda como recursu interpretativu del paisaxe. El tribunal dio-y al trabayu de Ferreira la calificación de Cum Laude, y la tesis postula agora al títulu de "meyor trabayu d'investigación", un reconocimientu que-y podría valer a la tesis l'espublizamientu al traviés de la editorial de la mesma Universidá de Salamanca.