Presentóse SOS Asturian Language

Presentóse güei al meudía nuna céntrica sidrería de la Plaza'l Paragües d'Uviéu la campaña SOS Asturian Language. Trátase d'una campaña internacional qu'entama la Xunta pola Defensa de la Llingua Asturiana y que busca la participación activa de toles persones y entidaes comprometíes cola defensa del asturianu pa dar a conocer -dientro y sobremanera fuera del Estáu- el conflictu llingüísticu que carez Asturies y la gravedá de la situación actual. Ye un llamáu internacional a toles instituciones y organizaciones civiles pa movilizase y presionar a favor de la supervivencia del nuestru idioma.
L'actu foi un éxitu multitudinariu de públicu. Ellí taben representantes de l'Academia de la Llingua, la Universidá d'Uviéu, sindicatos y partíos políticos como'l diputáu de la URAS Leonardo Verdín, Rafa Palacios del Bloque por Asturies o David Rivas por Andecha Astur ente otros.
La campaña aglútinase alredor d'una páxina web que quier ser un portal de referencia onde se centralice tola información sobre la represión llingüística y les consecuencies del conflictu. Tamién va ser una base de datos onde se va disponer de tolos informes sobre la situación sociollingüística. Esta web ta disponible en más de trenta idiomes y va cuntar con collaboradores per tol mundu.