Presentóse la sidra d'etiqueta d'anguaño

La directora Xeneral d'Agroalimentación Tomasa Arce asistió esta mañana en a la presentación de la III sidra de "mazana seleccionao d'Asturies" que se fizo nes instalaciones de Sidra La Nozala en Porceyo (Xixón)

La entrada esti añu de dos llagares más a la marca permitió llegar esti añu al millón y mediu de llitros de producción de sidra d'esta marca, que se creo va agora trés años gracies a la iniciativa particular de llagareros y cosecheros de mazana de sidra como una solución transitoria énte'l retrasu na creación de la Denominación d'Orixe y tamién como una marca de calidá que defendiere la producción autóctono contra la invasión de mazana de fuera de baxu preciu y calidá.

Foncueva, Trabanco, Muñiz y La Nozala, a los que s'amiesten dende esti añu Peñón y Sopeña son los seyes llagares que-yos ufierten a los sos veceros esta sidra ellaborao con mazana asturiana dafechu de les 22 variedaes reconocíes tamién na D.O.

Los llagareros presentes na marca y José Luis Rodríguez, auditor de CECA, emponderaron los criterios de calidá d'esta marca de sidra, que son superiores incluso a los que manda la propia DO.

El fechu de qu'esti añu coincidan yá en mercáu la marca particular "mazana seleccionao" que sostienen estos seyes llagares y la sidra acoyío a Denominación d'Orixe, que presentó va poco la so primer collecha, foi ún de los temes que protagonizaron l'actu de presentación. Nesti sentíu, Samuel Trabanco, de Sidra Trabanco, esplicó que, anque nun se descarta una futura integración d'esta marca na D.O, pa ello van tener que dase delles condiciones, ente les que destacó la falta de que'l reglamentu de la DO, que protexe especialmente a la sidra "de nueva espresión" y lo gasificao, dea una mayor protección a la sidra tradicional de tirar. Per otru llau los empresarios nun contemplen l'enxertamientu de la so marca nuna Denominación d'Orixe que de momentu ye provisional hasta que l'apreben definitivamente en Bruseles.

Esa voluntá d'integración sorrayóla la directora xeneral d'Agroalimentación Tomasa Arce, quien declaró que "ye bono qu'esistan marques distintes dientro de la Denominación d'Orixe" y espresó'l deséu de que "podamos ver esta sidra contraetiquetao dalgún día col sellu de la Denominación d'Orixe"

Respective a la comercialización d'esta sidra de mazana seleccionao, que'l consumidor va poder mercar a un preciu de 2,5 euros la botella, Samuel Trabanco destacó qu'un volume de la producción de cerca de mediu millón de llitros mándase directamente al mercáu esterior, onde la sidra d'etiqueta tien muncha aceptación. Otramiente, la Sidra de Mazana alcuentra tamién nel mercáu interior asturianu nichos de mercáu estables gracies a la esistencia d'ún públicu de gustu evolucionáu qu'ayudó enforma a que les dos colleches anteriores se vendieren enteres

Al actu asistió tamién Luis Tejuca. El presidente saliente d'HUNOSA acudió a la presentación en calidá de director de la Sociedá Asturiana de Diversificación Minera SADIM. Tejuca, que se reivindicó como persona venceyada a la sidra dende neñu, esplicó qu'al traviés de SADIM creáronse de va unos años p'acá pumaraes de sidra en vieyes escombreres de mina que faen anguaño una masa de más de 38.000 árboles que contribuyeron enforma a la rexeneración de numberoses zones dañaes enforma pola actividá industrial. Tejuca dio anuncia de que toes eses pumaraes tan acabantes de vendese a Sidra Trabanco, que va ser quien les lleve d'agora en p'alantre, y tamién de la creación de GoldFruit, una empresa nueva dientro del sector hortofrutícola ñacida tamién de la iniciativa de SADIM.