Presentóse la Casa d'Asturies en Valencia

Esti sábadu 25 d'ochobre inauguróse
oficialmente la Casa d'Asturies en Valencia. A falta de locales propios, l'actu celebróse nel Puertu de Valencia, y a elli asistieron como representación asturiana Miguel Fernández Romero, Director d'Emigración y Manuel de la Cera, Vicepresidente del Conseyu de
Comunidaes Asturianes. Pol Ayuntamientu de Valencia foron los conceyales
Félix Crespo y Consuelo Orias, amás de los presidentes de los Centros Asturianos d'Alicante, Benidorm y Castellón y más de 200 asturianos que s'enfrentaron al agua que cayía aquella tarde p'asistir a los actos oficiales y la posterior espicha.

La primer Xunta del Centru, a falta de que se convoquen elecciones, compónenla José
Mª Pérez Arias como presidente, Carmen Revuelta
Gutierrez na vicepresidencia, Inmculada Alvarez Cano d'ayalguera, Gonzalo Díaz
Granda como secretariu y los vocales María Manso Díaz-Laviada, José L.
Quirós Secades, Pedro Páramo Lobeto y Rodrigo Ménendez
García. Anque'l centru entovía nun dispón de local social, como dirección provisional tien la del Restaurante María, que lleva una asturiana afincada
en Valencia. Ente los primeros oxetivos del centru acabante nacer ta el facer actividaes de tipu cultural y presentar la so candidatura a la concesión de l'asturianía

El centru ñaz con bien de sofitos d'empreses asturianes que trabayen na comunidá valenciana, y asina los organizadores quieren agradece-yos la so collaboración pa echar a andar a Caxastur, Alsa y Aceralia xunta los llagares Acebal,
Trabanco, La Nozala, el Gaiteru y Zarracina, Conserves Agromar, Embutíos
Mino, Quesos de Cabrales, Agua Fuensanta, Cafés Oquendo, y a instituciones como l'Ayuntamientu de Xixón y Pirotecnia Pablo de
Cangas de Narcea.