Preséntense los afayos del Campamentu de La Carisa

L'equipu d'arqueólogos al cargu de la primer campaña d'escavaciones en castru La Carisa presentaron ayeri los primeros afayos atopaos nel yacimientu nun actu al qu'asistió la Conseyera de Cultura.

Según esplicó l'arqueólogu Rogelio Estrada, la escavación dio hasta agora 60 oxetos, los más d'ellos ferramientes y puntes de fleches, anque tamién hai dos monedes romanes, y el campamentu pue datase nuna fecha alredor del añu 25 a.c. Estrada entiende que'l campamentu de La Carisa valió pa la conquista militar d'Asturies por Roma, destacando la importancia del aparatu defensivu con que cuenta'l campamentu y tamién la bona conservación que presenta.

Al actu asistió la Conseyera de Cultura Ana Rosa Migoya. La másima responsable de polítiques culturales comprometiose a collaborar con Caxastur pa que se finacie la segunda parte de les escavaciones, anque tamién interpretó'l valor de La Carisa más allá de lo cultural, ufiertando'l campamentu como un elementu de promoción turística pa los conceyos d'Ayer y L.lena.

Yá enantes d'entamar les escavaciones, larqueólogu Rogelio Estrada escribió, xunta l'arqueólogu del Principáu Jorge Camino y Yolanda Viniegra esti artículu na revista "Asturies, memoria encesa d'un país" esplicando les primeres impresiones que tuviere al esaminar La Carisa, un yacimientu del que se tien noticia dende mediaos del sieglu XIX pero que nunca nun hasta agora s'escavare.

La Carisa destaca por ser el campamentu romanu asitiáu a mayor altura de tol imperiu, una característica que nun ye casual. Ello ye que nos años 60 y 70, l'especialista n'arqueoloxía castreña J.M. González descubriera y catalogara dellos "castros" a muncha altura, adelantando la hipótesis de que pudieren ser asentamientos estacionales pa la ganadería o bien campamentos de vixilancia, probablemente romanos, pero que tamién pudieren ser indíxenes. De toles maneres, los afayos en la Carisa (nome que vendría de Carissius) identifíquenla claramente como una instalación militar romana, colo que s'alluma'l debate historiográficu sobre les guerres cántabres, nel que sigue ensin esclariase los escenarios de batalla nin les vies peles qu'entraron los romanos n'Asturies. Posteriores campañes arqueolóxiques tedrán d'apautar el periodu d'usu del campamentu y si tuvo otres fonciones aparte de la guerrera.