Preséntase la Vuelta del 2.003 con salida en Xixón

La empresa Unipublic, que dende va 25 años organiza la Vuelta Ciclista a España, presenta esta tarde en Madrid el recorríu de la que va ser la Vuelta del 2.003, na qu'Asturies va tener abondu protagonismu. Ello ye que l'añu qu'entra la Vuelta va salir de Xixón y fadrá les dos primeres etapes en suelu asturianu, lo que va concentrar na ciudá a tola reciella de periodistes, ciclistes, técnicos y demás xente que mueve una carrera del altor de la ronda española. L'Ayuntamientu de Xixón pagó-y a la organización de la Vuelta 103 millones de pesetes por tener esti privilexu, que, otramiente, va desaniciar del recorríu de la Vuelta les etapes de montaña asturianes, másimu atractivu de la preba deportiva y que nun puen programase na primer selmana de carrera. Por poner un casu, na Vuelta del 2.002, la etapa del Altu l'Angliru viéronla más de venti millones de persones, que tendrán d'esperar al 2.004 pa ver otra vegada la xubida al cume riosán.

La Vuelta 2.003 sal de Xixón el 6 de setiembre con una escontra-reló per equipos en Xixón, pa siguir el día 7 cola etapa Xixón-Canguess d'Onís.
El día 8 la vuelta saldrá d'Asturies camín de Santander. Les llegaes en alto entamen el día 11, que la vuelta va metese pel Pirinéu Francés
y Aragonés, anque lo más gordo va ser el día 21 col ascensu a La Pandera, un altu que vien a ser l'Angliru andaluz.