Presentación oficial de Yá!

El xueves 26 "Felpeyu" va facer un conciertu en Xixón pa presentar de forma definitiva'l so últimu discu al públicu asturianu.

El grupu nun pudo facer enantes un conciertu presentación del discu por culpa de la lesión que sufría nuna mano'l guitarrista del grupu Carlos Redondo. Agora que'l músicu ya ta recuperáu de la lesión, el grupu va saldar una "deuda" que tenía colos sos aficionaos y va tocar en directo los temes qu'enllenen esti nuevu cd de "Felpeyu". El conciertu va ser el xueves día 26 a les 21:00 hores na sala Albéniz de Xixón, la entrada ye namás de 5 euros, y la organización del conciertu cuenta cola collaboración de la "Xunta pola Defensa de la Llingua Asturiana", pa qu'aparte de la música, la revindicación llingüística tamién seya protagonista d'esta nueche.

Pa conocer más coses del grupu y de "Yá!", güei ufiertamos a los nuestros llectores sentir esta entrevista en formato mp3 fecha por Xandru Osuna nel programa "El Xorrecer d'Asturies", que s'emite tolos vienres a les 19:00 hores nel 106.9 de la FM uvieina.