Premiu européu pa Electra del Carbayín

La empresa asturiana Electra Norte, filial d'Electra del Carbayín pa les enerxíes renovables, ganó esti añu'l prestixosu premiu "Eurosolar" qu'entrega dende 1988 L'Asociación Europea poles Enerxíes Renovables ente que preside l'alemán Hermann Scheer. Luis Díaz, xerente de la pequeña compañía del conceyu de Siero vencedora na estaya d'empreses, va recibir esta tarde'l premiu en Barcelona xunta otres entidaes y persones ganadores n'otros separtaos.

L'acta del xuráu reconoz los méritos d'Electra Norte como compañía independiente dafechu de los grandes xeneradores y distribuyidores eléctricos que manden en mercáu que, en 1997, decidió sacar alantre un proyectu propiu de xeneración de corriente al través de fontes renovables, convirtiéndose na primer empresa en tol estáu español n'algamar la certificación de comercializador de corriente verde. El xuráu tamién tuvo en cuenta que la compañía asturiana busca enxertar al cliente nos sos proyectos de xeneración con renovables, faciéndolu parte d'ellos al traves de fórmules nueves como les cuentes de participación.

Esti importantísimu premiu vien a da-y un emburrión al llabor d'una compañía pequeña que ñavega de momentu con total independencia de les grandes compañíes internacionalizaes que remanen el negociu y que xeneren mayormente con medios "puercos" como les grandes centrales térmiques de carbón y gas o los reactores nucleares.

Electra Norte tien funcionando anguaño una planta solar de xeneración y ta trabayando pa echar a andar un parque eólicu en Penouta (conceyu de Bual), pero, arriendes de los proyectos de xeneración, l'apertura pa esti añu 2.003 del mercáu d'electricidá domésticu va suponer pa esta compañía una ocasión única pa espoxigar. Dende xineru del 2.003, los consumidores domésticos d'electricidá van poder escoyer que compañía quieren que-yos apurra la corriente, y Electra del Carbayín, que da serviciu anguaño 4.300 cases en Bimenes y Siero, cuenta con meyorar esta cartera de clientes y doblar la facturación a lo llargo del añu, un oxetivu pal que ta acabante d'abrir una oficina comercial nueva en Siero.

Aparte de verde, Electra de Carbayín ye una de les empreses que más compromisu tienen cola llingua asturiana, preba d'ello ye que les factures que-yos dan a los clientes van n'asturianu, una llingua que tamién ta presente nel web de la empresa. Esti compromisu valió-y a Electra del Carbayín p'algamar l'añu pasáu el premiu "Andrés Solar" qu'entrega la Xunta Pola Defensa de la Llingua Asturiana.