Premia'l meyor cantar n'asturianu

Asturies.com entama güei un concursu pa que los nuesos llectores puedan votar al meyor cantar n'asturianu.

L'apaición esti añu de la categoría al meyor cantar n'asturianu dientro de los premios de la música de la SGAE punxo de moda la discusión ente los aficionaos a la música asturiana de cuál ye'l meyor cantar n'asturianu del últimu añu. Poro Asturies.com ufierta una manera de saber cuál ye pa los más de los llectores d'esti diariu'l meyor cantar n'asturianu de 2004.

Los cantares a los que pue votáse son aquellos que cumplan coles normes qu'establez los premios de la música qu'organiza l'Academia de la Música. Pal concursu n'Asturies.com nun partimos de nanguna llista oficial de candidatos, y pue votáse al cantar que se quiera con tal deque cumpla les condiciones que comentamos darréu. La condición principal ye que seyan obres orixinales musicales o músico-lliteraries que, espublizaes o espardíes nos encontos fonográficos o videográficos que se nomen nel contratu-tipu BIEM-IFPI, se distribuyeren per primer vegada ente'l 1 d'avientu de 2002 y el 30 de payares de 2003. Amás la categoría de meyor cantar n'asturianu diz que podrá presentáse aquella composición músico-lliteraria orixinal escrita n'asturianu.

Nuna primer fase dende güei y hasta'l 5 de xineru va poder votáse al cantar que se quiera con tal que cumpla coles condiciones nomaes más p'arriba. Esi día fadrase una esbilla y la elección saldrá de los tres cantares con más votos, ente los que se fadrá una votación final.

Ente los participantes nel concursu vamos sortiar dos llotes que lleven caún un compilatoriu de L'Aguañaz "10 años d'independencia", un discu compilatoriu "Nel Cantu la Memoria" de Fonoastur, la edición 2003 de la guía del buscador "Úlos?" y l'Anuariu de la Música Asturiana 2.003.

Pa votar hai que dir a esta páxina, poner el cantar y interprete y dexar el to e-mail, a efectos de poder contactar colos ganadores pa poder participar nel concursu, un procesu cenciellu. Participa y gana premios con Asturies.com