Precísense xueces pal ganao

Anque paeza una actividá cada vegada más escaecida, n'Asturies celébrense tolos años más de 50 concursos de ganao, pero la continuidá d'estos certames ta amenazada, más que pola falta de ganao, pola falta d'espertos en raza de vaca d'Asturiana de la Montaña. Ello llevó a los organizadores de la feria agropecuaria de Xixón Agropec 2003 a organizar un cursu de xueces pa estos concursos.

El cursu tien l'oxetivu de formar a 30 ganaderos y técnicos pa que puean xulgar nos certámenes d'Asturiana de la Montaña. La Feria del Campu y de les Industries Agrícoles, Ganaderes, Forestales y Pesqueres, AGROPEC, qu'organiza la Cámara de Comerciu de Xixón coincidiendo nel calandariu cola fiesta de San Miguel, va ser el marcu en que se faiga'l concursu, que van poner técnicos de l'asociación de criadores ASEAMO y xueces n'activo. Pa tener con qué trabayar, la Feria va incluyir una muestra de más de 100 animales d'Asturiana de los Valles y d'Asturiana de la Montaña, que tamién va poder contemplar el públicu en xeneral.