Poli Ejido 0 - Sporting 0

Les 14 hores d'autocar que tuvieron que facer los futbolistes del Sporting pa llegar hasta Almería nun son escusa pa xustificar lo que se vio ayeri nel campu del Poli Ejido, onde'l peor sporting del añu nun foi a fender les mancadures d'un Ejido qu'entamó cigüáu esta temporada y qu'ocupa los puestos del fondu de la tabla.

L'equipu acusó la falta de Dani Borreguero, y los asturianos plantegaron un partíu ramplón, faltu de xuegu y dacuando hasta violentu. Sicasí, ello pudo ser abondo pa llevar los tres puntos contra un Ejido que demostró por qué ta empozáu na tabla. Namás los diez primeros minutos emburrió l'equipu almeriense, qu'estampó un balón nel poste. Depués el Sporting recompúsose y foi tirando, anque coles llinies mui desapegaes y ensin centru de campu, llabor que-y correspondía a Jsvi Fuego. Los asturianos meyoraron na segunda parte cola entrada de Pablo Álvarez y David Bauzá, acosando muncho al Ejido a lo último. Bilic tuvo la meyor ocasión del Sporting col partíu acabando, pero en cuenta de collaborar con Sastre, el croata empixóse depués d'una xugada mui bona.