Polémica tres el cuartu puestu d'Alonso n'Alemaña

El primer fallu del añu conduciendo en carrera costo-y a Fernando Alonso el poder facer terceru na meta del Gran Premiu d'Alemaña de Fórmula 1, en que'l colombianu Montoya foi líder dende la primer vuelta, demostrando que los Williams BMW tan penriba de los demás coches. La carrera marcola l'accidente a la salida ente Ralf Schumacher, Barrichello y Kimi Raikkonen, que dexó a tres de los favoritos fuera d'una carrera revuelta y estrada d'incidentes como'l pinchazu que-y costó a Michael Schumacher la segunda plaza nel podiu. Foi gracies a esi pinchazu que los Renault xubieron hasta la tercer y cuarta plaza, pero con Trulli per delantres del pilotu asturianu, y ello por culpa de qu'Alonso, que ficiere una salida de llibru, nun intentu por adelantar al compañeru d'equipu, acabó saliendo pela pación, quedando definitivamente per detrás del italianu, que nun recibió órden de dexar pasar al asturianu anque esti venía rodando más fuerte. Alonso perdió dellos segundos y quedó unes vueltes tocáu, entamando darréu una remontada qu'acabó na mesma llinia de meta... a dos décimes de Trulli.

L'error d'Alonso vieno depués de dar delles vueltes al rau del coche de Trulli, quien, aprovechando que l'asturianu taba entreteníu charrando colos boxes, punxo esfaltu per medio. Alonso intentó volver a ponese al par del Trulli, momentu en que'l coche esbarió y metiose pela pación, perdiendo ehí l'asturianu toa posibilidá de pasar al compañeru. Toa esta maniobra asoleyó otra vuelta la polémica ente Renault y Alonso xusto la selmana en que la escuadra francesa anunció una meyora nel contratu del asturianu pal 2.004, y ye que ye la tercer vez que en Renault nun faen casu de los deseos d'Alonso. La primera foi en Mónaco, qu'Alonso quería facer una sola parada en boxes y l'equipu mandolu parar dos vegaes. La segunda, en Canadá, onde pasó lo mesmo. Agora, echando la cuenta de la llechera, resulta qu'Alonso bien pudo acabar en segunda posición n'Alemaña tres del avión Williams. Ello ensin quita-y méritu a los de Trulli, qu'acabó la carrera deshidratáu y baldáu depués de perder toles asistencies electróniques del coche y tener que pilotar "a mano" les vueltes del final