“Podré aportar na vía lliteraria y na pedagóxica”, asegura Rodríguez Medina

Nel 2020 entró na Academia de la Llingua Asturiana (ALLA) como académicu correspondiente y el 3 de mayu, nel XL Día de les Lletres Asturianu, va ser acoyíu como académicu de númberu. Pablo Rodríguez Medina confiesa que "toi tovía nuna nube".

“Será mayor a partir d’agora’l compromisu y la responsabilidá dientro de l’Academia”, esplica sobre’l cambiu que supón pasar a ser académicu de númberu. Entreguín del 1978, Rodríguez Medina ye profesor de Lengua Castellana y Literatura en Secundaria y Bachilleratu, y “la so condición de filólogu Especialista en Llingua Asturiana tamién-y permitió ser profesor de Llingua Asturiana y Lliteratura nueve cursos académicos”, apunten dende l’ALLA.

“La so bayurosa producción pue xebrase en dos estayes. Como escritor en práuticamente tolos xéneros lliterarios, tien ganao dellos de los concursos más importantes del país. Como estudiosu de la lliteratura, amás de crítica en delles revistes de creación, ye autor d’una importante coleición d’obres d’analís lliterariu”, añaden al tiempu que tamién rescamplen el “so historial como docente nos programes formativos de la institución y la publicación, dientro d’ella, d’ocho obres lliteraries y dellos artículos d’investigación”.

Rodríguez Medina considera “que se fai un reconocimientu al traviés de min a la lliteratura que se ta faciendo n’asturianu, al llabor que ta faciendo de normalización y de normativización tamién en parte la lliteratura n’asturianu, que ye un motor importante, y al llabor desendolcáu na faza pedagóxica. Yo creo qu’eses dos son les víes nes qu’encaxa meyor el mio perfil y serán nes que yo pueda aportar mayor esperiencia, idees y creatividá”.

Investigación lliteraria, tar al tantu de lo que se ta faciendo nel terrén creativu… “Y sobre too, acoyer les propuestes y necesidaes, y ver en qué midida dende l’Academia se pue aportar, en munches cuestiones que te faen llegar compañeros que tan poniendo clas d’asturianu”, añade.

Un discursu “menos personal”

Dende’l so nomamientu como académicu correspondiente nel 2020, en plena plandemia de COVID-19, “siguí poniendo clas nos cursos de la UABRA, como venía faciendo, y dalgunes vegaes fixi llabor de representación de l’Academia en dellos actos, dellos concursos, como’l Teodoro Cuesta”. Una aportación que va aumentar con esti nomamientu que “ye’l máximu reconocimientu que cuento te pueden dar”.

“Toi tovía nuna nube, un poquitín sobrepasáu”, señala Rodríguez Medina, que polos nervios contaba dexar pa güei la redaición del acta d’afirmación pola qu’acepta esta responsabilidá que se-y comunicó’l llunes. “Que la máxima institución, onde ta presente la mayor parte de les autoridaes llingüístiques y tamién lliteraries del asturianu, m’acueya… Toi asimilándolo”, valora.

El vienres 3 de mayu va xubir al escenariu del Campoamor pa dicir unes pallabres, ensin mázcara y con munchu públicu, non como aquel ochobre del 2020, cuando participó na sesión estraordinaria de l’ALLA pol Día de les Lletres Asturianes celebrada nel Aula Magna del Edificiu Históricu de la Universidá d’Uviéu con restricciones d’aforu pola situación sanitaria. “Va ser bastante difícil, porque nun pensaba veme otra vez na tesitura de tener que preparar otra vez un discursu. Quemé cuasi que tola pólvora naquello”, espresa l’escritor de L’Entregu, qu’apunta que magar que “yá dixi cuasi tolo que tenía que dicir, creo que tovía hai coses que puedo estender y que puedo pone-y voz a determinaos sectores como’l de la lliteratura o’l de la educación. Quiciabes seya un discursu menos personal, pero tan emotivu como l’otru”.