Podemos y IX piden separtar la negociación sobre la reforma del Estatutu de la presupuestaria

|
Alberto Suárez, Ángela Vallina, Rafael Palacios y Yahia Edjil

“Penriba de too ponemos el consensu y l’alcuerdu; ver les cuestiones que compartimos, les que s’almiten y coles que tol mundu se siente cómodu, p’aprobar la reforma estatutaria”, espresó esti miércoles Rafael Palacios. El diputáu de Podemos y Ángela Vallina, d’IX, coincidieron en pidir la separación d'esta negociación de la de los Presupuestos.

“Nun ye propio envolver el tema de la reforma p’aprobar la oficialidá nuna axenda económica de la derecha”, señaló la vocera de la coalición sobre la propuesta d'ayeri del diputáu d'Adrián Pumares nuna llinia asemeyada al de Ciañu llueu d’una rueda de prensa pa denunciar la situación de l’activista saḥaraui Sultana Jaya, en peligru de muerte. “Creo qu’hai que distinguir lo que ye una negociación pa una reforma estatutaria de lo que ye una negociación presupuestaria y de lo que ye otru tipu de negociaciones”, dixera previamente Palacios, que reclamó “seriedá” y entainar coles negociaciones pa poner el procesu en marcha pa cumplir los plazos.

“Yá hai 27 votos na Xunta Xeneral. Lo qu’hai qu’entamar a facer ye buscar el marcu d’alcuerdu y implementalu, y dexar d’entrar a les provocaciones que tán faciendo dende grupos parllamentarios que lo único que quieren, como la estrema derecha, ye dinamitar el procesu de negociación, dinamitar l’estatutu y terminar cola autonomía asturiana”, siguió. “Nun podemos armar d’esto lo que quier la derecha: la división de la izquierda, que nos empecemos engarrar, non”, rescampló Vallina, que censuró l’actuación ayeri de VOX y los “shows y discursos” de la ultraderecha “pa desprestixar la política y les instituciones públiques”.

La situación de Jaya

Palacios y Vallina acompañaron esta mañana a Yahia Edjil, delegáu del Sáḥara n’Asturies, y Alberto Suárez, de la Plataforma Asturiana Paz y Justicia para el Pueblo Saharaui, pa dar a conocer la grave situación y el peligro de muerte de Jaya, y esixir al Gobiernu que se dirixa a Naciones Xuníes, Xunión Europea y al Executivu estatal pa qu’actúen con urxencia “tanto pa defender la integridá física d’esta muyer persiguida por Marruecos como pa que l’Estáu asuma les sos responsabilidaes como “potencia alministradora” de la vieya colonia. L’activista que trabaya polos derechos de les muyeres y l’autodeterminación del so pueblu lleva un añu n’arrestu domiciliariu “impuestu poles autoridaes paramilitares marroquines” xunto a la so familia, siendo sometíos a maltratatos y agresiones físiques, psicolóxiques, verbales y sexuales pa que dexen les sos reivindicaciones.

Na imaxe, Suárez, Vallina, Palacios y Edjil. Semeya obra d'Iván G. Fernández.

Contador Estadistiques