Podemos va entrugar a Barbón sobre los plazos pa reformar l'Estatutu y declarar la oficialidá

|
Daniel Ripa

Daniel Ripa rexistró una pregunta coincidiendo cola celebración de la XLII Selmana de les Lletres Asturianes.

"¿Comparte usté con nosotres que ye'l momentu de que les fuercies polítiques qu'apostamos pola oficialidá, y que yá tenemos la mayoría parlamentaria necesaria, llevemos alantre la reforma estatutaria pa garantizar los derechos de los y les falantes d'asturianu y gallego-asturiano, en consonancia cola mayoría social que defende la oficialidá?" ye la entruga que Podemos tresllada a Adrián Barbón mañana al respeuto de la cuestión llingüística na segunda xornada del Plenu que se ta celebrando na Xunta Xeneral y que se va retomar a les 9.30 hores. Ésta tien como oxetivu conocer los plazos del presidente pa declarar la oficialidá del asturianu, pa lo que ye necesario contar col sofitu de trés quintos de la Cámara, esto ye, 27 diputaos.

Hasta esti momentu tanto'l llavianés como los miembros del so Gobiernu falaron del 2021 como l'añu nel que s'entamaría'l procesu, dando prioridá a la xestión de la pandemia y les sos consecuencies. L'avance de la campaña de vacunación y l'ameyoramientu de la situación sanitaria podría-y llevar a concretar más los plazos agora.

Contador Estadistiques