Pocu volume de negociu

El pocu volume de negociu de la selmana espeya'l mieu qu'entovía tienen los inversores a una posible guerra. Ensin dulda foi una selmana de resultaos empresariales: Terra, con perda de 2.000 millones d´euros, Jazztel, con perda tamién de 150 millones d´euros nel 2002 lo mesmo que los resultaos probetayos de Sol Meliá, Endesa y Recoletos menguaos poles provisiones y los saniamientos pa cubrir riesgos. Nos mercaos internacionales tornaron alcordances vieyes cola anuncia de la empresa distribuidora holandesa Ahold de que ficiere maquillaxe colos sos resultaos contables. Tampoco-yos prestó un res a los accionistes y inversoreses la mala traza de resultaos que presenta pa esti añu la empresa de ordenadores Hewlett-Packard.

L'entamu de la selmana foi con baxes xeneralizaes nes places europees xunta Wall Street, y los índices, qu'andaben taramellándose, acabaron de picar p'abaxo col casu del misil norcoreanu que cayó nel mar del Xapón, los problemes de les empreses de telecomunicaciones y la baxa confianza de los consumidores d´Estaos Xuníos. El conflictu iraquí punxo lo que faltaba pa que les bolses cayeren dafechu, pero a mediaos de selmana un reblagu nel rumbu del mercáu poles bones estadístiques económiques espublizaes ficieron poder pesllar el mes en positivu.

Otra bona noticia pa los mercaos foi qu'Arcelor presentó resultaos perbonos, al menguar la perda de la multinacional siderúrxica nun 64%, ello tamién xunta los resultaos bonos de Zeltia y d´Unión FENOSA. Sicasí, el datu que más s'esperaba yera'l PIB de los Estaos Xuníos, que dio una medria del 1,4%, xunta otros datos americanos como les manufactures de Chicago o'l datu de confianza de la Universidá de Michigan que perpasaron les espectatives de los analistes.

N'España l'Ibex asitiose nos 5.999,40 puntos, lloñe del mínimu del miércoles cuando cayó a 5.782 puntos. Va tiempu que'l selectivu perdiere la referencia de los 6.000 puntos, pero la xuba xeneral de la selmana nel IBEX igüó un permalu mes de febreru con un probetayu 0,9% positivu. Ello nun quita pa que'l conflictu iraquí marque´l ritmu a un mercáu en que les empreses nun dexen d'anunciar resultaos malos pa esti añu y nel que les gráfiques que van saliendo son toes bien febles. La tendencia baxista del mercáu nun va cambiar en cuantes la inestabilidá política internacional y el riesgu de crisis económica en dellos países industrializaos seyan una realidá como son agora.