Planta de gas en San Xuan de Nieva

Delles asociaciones de vecinos, ecoloxistes y losgrupos de la oposición nel Conceyu de Castrillón refuguen la instalación en San Xuan de Nieva d'una planta de gas licuao, que de facese, diría xusto nel mesmu llugar onde yá s'echó p'atrás un proyectu l'añu pasáu pa mangar una planta d'abonos químicos.

El proyectu abandéralu la casa Zeta Gas, y inclúi seyes depósitos reondos con capacidá pa 5.865 metros cúbicos y un gasoductu dende'l muelle de Raíces, arriendes de delles instalaciones suplementaries. La planta procesaría hasta 120.000 tonelaes al añu de gas licuao pa tresformalo en butano y propano, y crearía sobre 50 puestos de trabayu.

La Coordinadora coloxista d'Avilés, en conociendo los detalles del proyectu, ta acabante de presentá-y al ayuntamientu los puntos en que nun ta d'alcuerdu cola planta. Los ecoloxistes dicen que'l proyectu nun contempla delles normatives de seguranza en materia de tratamientu del gas, y que'l riesgu que conlleva la planta ye grande al tener cerca los depósitos d'acidu sulfúrico d'Asturiana de Zinc, too ello arriendes de tar pegando cola Playa l'Espartal, que lleva tiempu recibiendo tratamientos de protección y onde una parte ta declarada Monumentu Natural.