Pixán actúa na basílica de Cuadonga pa estrenar ‘El nacimientu del reinu’

|
Joaquín Pixán

Un viaxe musical y lliterariu dende Lleón hasta Cuadonga nel que se convierten testos de nueve escritores y poetes en cantares y una cantata. Ye la propuesta del tenor Joaquín Pixán con ‘El nacimientu del reinu’, conciertu creáu a costafecha pa la conmemoración Cuadonga 2022 pa celebrar los 1.300 años de la batalla.

El repertoriu d’esti conciertu inclúi pieces de Pedro de Silva (‘En Covadonga el milagro’), Pablo García Baena (‘Aula regia’), Luis del Val (‘Loa a Covadonga’), Fernando Álvarez (‘Agua de la fuente clara’), Ángel Fierro (‘Almuzara, nieve del alto frío, ¿por qué será que en la alta noche?’), Alfonso Sánchez Lorenzo (‘La noche azul’), Javier Almuzara (‘Rosa Narcea’), Aurelio González Ovies (‘Oro del norte’) y Xuan Xoxé Sánchez Vicente (‘El nacimientu del reinu’). Los xéneros de la tradición popular asturiana inspiren la mayoría de los temes arreglaos por Pixán en collaboración col músicu Manuel Pacheco, cola única esceición a esi filu conductor del folclor tradicional na cantata que da títulu al espectáculu, na que’l llinguaxe musical encaxa nel formato de narración por etapes que propón el conciertu.

Pixán va tar acompañáu na basílica por Pacheco (pianu), Martín Pérez (flauta), Nel Pérez (clarinete) y Javier Romero (cellu). Sánchez Vicente y Fernando Entrialgo van actuar como narradores pa guiar al públicu peles distintes etapas que conformen esti espectáculu.

La xente interesao n’acudir a la estrena de ‘El nacimientu del reinu’ esti domingu, con entamu previstu pa les 19 hores, han retirar previamente invitación nesti enllaz, con plazu hasta les 24 hores enantes de que'l conciertu arranque.

Contador Estadistiques