Piterman ¿salvación o acabación pal Sporting?

La crisis económica del Sporting de Xixón nun ye asuntu nuevu. Dende que l'equipu cayó a segunda división, el pufu de la entidá que preside Vega Arango foi medrando como un matu d'escayos que naide nun yera a llimpiar, llegando va dos años a un puntu críticu que salvó l'Ayuntamientu de Xixón mercándo-y al equipu por 1.600 millones de pesetes los terrenos de la Escuela de Fútbol de Mareo, una decisión enforma criticada en cuantes que, d'embargalos Facienda, l'Ayuntamientu pudiere mercalos por menos de la metada. Ello nun foi abondo, y esti añu l'equipu anduvo otra vegada afogáu en deldes, recurriendo al trespasu de Villa al Zaragoza pa garrar un poco de fuelgu que duró bien poco: los trabayadores del equipu protagonizaron la selmana pasada la primer fuelga del equipu en más de 90 años d'historia en protesta polos sueldos que tienen ensin cobrar.

Metanes d'esti panorama, un inversor que ponga perres parez que ye lo que precisa l'equipu. Sicasí, naide nun contaba con Dimitri Piterman como salvador del equipu asturianu. L'ucranianu, qu'apeció estos díes abeyando alredor del equipu nun tien precisamente'l preste de les mases sportinguistes nin de les de nengún equipu. Ello ye que l'excéntricu inversor yá intentó l'añu pasáu un aterrizaxe asemeyáu nel Racing de Santander. Piterman mercó les acciones y aneció en ser entrenador del equipu anque carecía de llicencia pa ello, llegando a dase d'alta de fotógrafu pa poder da-y órdenes al equipu dende'l campu. L'esperimentu duró poques selmanes, y el conseyu d'alministración acabó quitándo-y el preste a Piterman, que nun tenía mayoría accionarial absoluta.

Dimitri Piterman, antiguu atleta soviéticu especialista en saltu reconvertiu n'inversor inmobiliariu na Ucrania post-comunista, podría facese cargu del equipu de fútbol más importante del país en casu de salir alantre les negociaciones que tien col actual accionista mayoritariu del Sporting, l'empresariu José Fernandez, que yá declaró tener intención de vender en casu de que daquién ponga perres y qu'aconceyó col ucranianu pa ponelu al corriente de la situación del equipu. Piterman dixo que precisaba de quince díes pa decidir, pero l'inversor tamién tien interés nel Rayo Vallecano, del que paez que quier marchar la familia Ruiz-Mateos. En Conceyu Abiertu de deportes estrenamos foru Piterman ¿sí o non?