Piñán, positivo por COVID-19

|
Berta Piñán comparecencia Comisión de Cultura, Política Llingüística y Turismu

La conseyera fixo un PCR el domingu llueu de tener síntomes. Los contaxos baxaron a 495 diarios de media na selmana pasada.

Berta Piñán anuló la so axenda pa los siete díes próximos al tener COVID-19. La responsable de Cultura, Política Llingüística y Turismu ta en bon estáu y namái cuenta coles molesties habituales que provoca la enfermedá causada pol coronavirus SARS-COV-2.

Estos síntomes principiaron a apaecer nos díes previos, polo qu'ayeri fixo una prueba PCR pa confirmar el contaxu. El resultáu de güei confirmó'l positivu, lo qu'obliga a Piñan a facer cuarentena per siete díes, como marca'l protocolu sanitariu actual.

13 finaos

Los casos nuevos de COVID-19 siguen baxando nesta quinta fola de la pandemia. Na selmana pasada rexistráronse 3.468, pasando de 188.021 confirmaos –nun primer momentu informóse de 187.878– a 191.489, polos 5.295 que se comunicaron l'anterior.

Supón pasar de 756 casos nuevos diarios a 495. Desque Asturies.com vien rexistrando esti datu, a lo último d'agostu del 2020, ésti evolucionó asina: 39, 46, 52, 83, 92, 92, 150, 210, 272, 334, 408, 508, 344, 252, 194, 125, 101, 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53, 51, 50, 55, 51, 57, 196, 448, 493, 423, 289, 194, 133, 77, 60, 42, 20, 12, 13, 11, 13, 17, 22, 32, 29, 70, 175, 322, 427, 632, 1.032, 1.905, 2.355, 3.143, 2.538 y 1.831, 1.174 y 756, hasta los 495 actuales.

No que respeuta a esta última fin de selmana, rexistráronse 1.106, polos 1.764 de l'anterior. Repartiéronse asina: 545 el vienres, 313 el sábadu y 248 ayeri.

Estos díes finaron 13 persones, 3 el vienres (1 muyer de 97 años y 2 homes de 89 y 62), 7 el sábadu (4 muyeres de 100, 99, 86 y 63, y 3 homes de 91, 72 y 63) y 3 ayeri (muyeres de 98, 87 y 83). No que va d'andanciu la cantidá de muertos asciende a 2.440 llueu d'una revisión nueva de datos.

Hai hospitalizaes 273 persones, de los que 246 tán en planta y 27 na UCI. Son 7 menos y 1 más que'l xueves, de manera respeutiva.

Na semeya, Piñán comparez el xueves na Comisión de Cultura, Política Llingüística y Turismu, ún de los actos últimos de la so axenda oficial.

 

 

 

Contador Estadistiques