Pieslle en positivo del Ibex

La última selmana nos mercaos bursátiles pintó-yos perfecha a los inversores, que ficieron un apueste claru pola renta variable. Les duldes macroeconómiques de les últimes selmanes desficiéronse gracies a les bones anuncies dende Estaos Xuníos. El datu de la selmana foi'l xorrecimientu del 4,1% de la primer economía del mundu. Con ello, les previsiones de recuperanza económica de la Reserva Federal de los EEXX van cumpliéndose pasín ente pasu. L'Ibex-35 medró un 4% nel mes de febreru lo que supón afitar les ganancies de xineru. La bona marcha de los valores del parqué madrilanu espéyase na fuerte revalorización de dellos chicharros y nel pieslle en positivo de casi tolos blue chips.

Les bolses del Vieyu Continente tuvieron el vienres un pieslle en positivo con xubes de mediu puntu nos parqués de Francfort, París y Llondres, mientres que nos mercaos norteamericanos hebo dellos blincos. Tanto l'índiz Dow Jones como'l Nasdaq tuvieron un feble pieslle con cayíes, asitiándose'l Dow Jones na raya de los 10.571 puntos mentanto que'l tecnolóxicu Nasdaq aguantó nos 2.021 puntos.

El selectivu índiz Ibex-35 algamó los 8.249,40 puntos con una xuba nel mes de Febreru del 4,03%. L'índiz xeneral de la Bolsa de Madrid medró un 3,98% y l'índiz tecnolóxicu Nuevu Mercáu tamién xubió un 2,37%. Asina caltiénse la cota sicolóxica de los 8.200 puntos. Dempués de dellos blincos el Grupu Telefónica algamó un bon resultáu. La operadora tiró con fuerza pel parqué madrilanu a lo llargo de tola selmana. Ente rumores de venta, TPI foi la estrella, con una revalorización nel mes penriba'l 29%. Nel llau de les ganancies destacaron xunta TPI los valores de Gamesa con una xuba del 10%, Prisa y Repsol-YPF. El sector bancariu coles xubes del BBVA y SCH tamién trancó en positivo. Nel terrén de les perdes destacaron Amadeus, Indra y Sogecable con perdes del 3%. Tamién tuvieron perdes NH Hoteles, Zeltia, FCC y Corporación Mapfre. El sector de les telecomunicaciones y les tecnolóxiques son les más favorecíes pol puxu inversor de les últimes selmanes. Les variaciones de la selmana pasada salieron a partir de la presentación de resultaos de la mayoría d'estes empreses.

Nesta selmana qu'entra les empreses van acabar de dar los resultaos y les previsiones de los próximos meses. Tamién va contar lo que digan el BCE y el Bancu d'Inglaterra, anque los analistes nun cuenten con cambeos nos tipos d'interés.