Pieslle en positivo de les Bolses nel mes d´Agostu

Perbonu mes d´Agostu pa les bolses internacionales onde´l baxu volume y la ilusión de dellos inversores ficieron posible caltener un signu positivo nos mercaos. Perimportante xuba del preciu del oru que torna a los máximos dende´l entamu d´esti añu. El petroleu sigue al rodiu los 30 dólares con munches duldes sobre´l futuru de la comercialización del crudu iraquino. L´Ibex-35 tuvo una perbona traza'l mes d´Agostu, con una serie de xubes selmanales encadenaes faciendo que seya´l meyor momentu del índiz nos últimos cuatro años.

Meyora xeneralizada de delles estadístiques macroeconómiques especialmente nos Estaos Xuníos. En parte esto presta-y esgaya a dellos inversores, mentanto los analistes financieros caltienen qu'a mediu plazu les perspectives de crecimientu son bien febles. Amás los resultaos de les empreses son tamién bien probetayos. Ente les estadístiques selmanales destaquen el datu del ratio ingresu y gastu personal que tuvo perbaxu de les previsiones. El prestixosu datu de confianza de la Universidá de Michigan foi de 89,3 puntos perbaxu del 90,5 esperáu polos analistes. Bon datu de Xerentes de Compres de Chicago con un resultáu de 58,9 puntos, mui penriba de los 56 puntos esperaos. Nel Vieyu Continente'l datu d´inflación foi l'esperáu polos analistes, d´un 2,1%. N´Alemaña la cayida de les ventes al por menor foi del 2,1%, un datu permalu en cuantu s´esperaba una feble baxada del 0,3%. A la contra, les ventes al por menor nel Estáu Español medraron un 9,1%, un perbonu resultáu.

Les principales bolses europees trancaron el vienres pasáu en negativo asina como Wall Street que nun algamó un bon pieslle selmanal. En xeneral tuvieron un bon comportamientu los valores tecnolóxicos, sobremanera nel índiz neoyorquinu Nasdaq. Les anuncies y critiques al sistema monetariu del presidente de la Reserva Federal, Alan Greenspan, nun-yos prestó un res a inversores y analistes. Como nota d´interés d'esti llunes los mercaos internacionales nun tendrán onde mirar, ya que Wall Street tranca pola Fiesta del Trabayu nos Estaos Xuníos.

Na Bolsa de Madrid l´Ibex peslló'l vienres pasáu nos 7.111,30 puntos con una baxada esi díi del 0,89%. La selmana trancó con una baxada del 1,3%, mentanto'l mes d´Agostu tuvo una medra del 0,7%. L´índiz xeneral de la bolsa madrilana baxó un 0,80% hasta los 749,89 puntos, mentanto que l´índiz Nuevu Mercáu tuvo una cayida del 0,5% pa mangase nos 1.851,90 puntos. El volume de negociu del últimu díi bursátil nel parqué madrilanu foi d´al rodiu los 1.500 millones d´euros. Ferrovial foi la estrella del mercáu con una xuba del 1,75% pola compra de la empresa de servicios Cespa. Ente les xubes destacaron Gamesa y NH Hoteles, con pieslles en positivo penriba´l 1%. Pero'l pieslle de la selmana nun foi positivo pa la mayoría de los valores. Nel terrén de les perdes el grupu Inditex nun aguantó les acusaciones de contrabandu en México. Acciona tuvo una perimportante baxada pola perda de confianza del segundu accionista de la empresa, un capital riesgu norteamericanu que ta acabante de vender la so abultada participación de la constructora. BBVA, SCH, Repsol y el Grupu Telefónica pesllaron la selmana en perdes.

Nos mercaos de materies primes l'oru prieto nun baxa de la cota de los 28 dólares barril trancando la selmana pasada nos 29,75 dólares, lo que supón una xuba selmanal del 1%. Meyor comportamientu tuvo'l preciu de la onza d´oru que garro muncha fuercia la selmana pasada hasta asitiase nos 376 dólares la onza. Este xorrecimientu del preciu del oru foi del 2% nel conxuntu de la selmana lo que ye la mayor subida nos últimos 6 meses. Otramiente, l´euru sigue perdiendo fuercia respectu al dólar y la moneda europea cotizase ya nos 1,10 dólares. La selmana pasada supuso pal euru caer al nivel más baxu nos últimos meses. Les esperances de recuperación nos Estaos Xuníos tan emburriando al dólar a los sos niveles habituales. Esto ensin duldes beneficiará al castigáu sector esportador européu que tan perdiendo munchos puntos de competitividá pola fuercia que garró la moneda europea. Nel mercáu de renta fixa sigue con un mal comportamientu onde ya munchos operadores dan por perdíu l'añu. La bona traza de delles estadístiques macroeconómiques norteamericanes ficieron que los bonos europeos pesllarán en perdes.