Pieslla la fábrica de gaites de Santu Adrianu

Dempués de trés años funcionamientu echa'l
pieslle la Fábrica de Gaites Les Xanes, colo qu'acaba un proyectu que
quería revolucionar el mercáu de gaites n'Asturies.



La fábrica lleva dende ochobre de 2003 ensin actividá y
acaba de solicitar la estinción de los contratos de los cuatro
trabayadores. La razón principal que presenta la empresa ye una "situación
de crisis total" que fai imposible pensar nun futuru pal proyectu. La
conseyería dio una rempuesta favorable a esta solicitú tres
comprobar que la fábrica ta efectivamente nuna situación de
crisis con deldes de 87.000 euros con proveedores, trabayadores y
seguridá social. La fábrica ta participa nun 40% pol
Principáu, otru 40% pol Conceyu de Santu adrianu y un 20% por
accionistes privaos, estos participantes de la sociedá agora van tener
que buscar una salida a la situación de los trabayadores y a les deldes
de la empresa.



Cuando n'avientu de 2001 echaba andar de cara'l públicu la
fábrica munches yeren les previsiones d'espoxigue nun mercáu en
crecimiento como ye'l de los instrumentos de música tradicional
asturiana. La gran cantidá de tiempu qu'hai qu'esperar por
términu mediu por una gaita podía significar l'ésitu
asegurao pa unos gaites entregaes al momentu. El pasu del tiempu nun traxo los
resultaos esperaos, y hai que llamentar el final d'esti proyectu que
quería ser ún de los entamos d'una industria d'identidá
cultural. Dempués del tiempu pasao y con esti resultáu ye'l
momentu de facer analís de que foi lo que falló, en cuantes al
productu, o si se fizo un mal analís del mercáu al que
s'enfrentaba la empresa.



Anguaño queda furrulando una fábrica que produz gaites
asturianes y qu'entamó casi al mesmu tiempu que la de Santu Adrianu.
"Hevia Parrado y Aragón" sigue alantre col so proyectu en
Guadarrma Madrid, pa conocer más coses sobre la fábrica impulsada
pol gaiteru asturianu Jose Ángel Hevia pue visitase
la so web.