Piden que l'asturianu seya vehicular na TV

L'aprobación de la Llei que va regular la futura TV asturiana tien malcontentos a dellos sectores interesaos nel tema. Ayeri, en rueda de prensa convocada pola Academia de la Llingua Asturiana, el Conseyu de la Mocedá del Principáu, la Xunta pola Defensa de la Llingua Asturiana y el colectivu Periodistes pol Asturianu, pidiose a modificación de la llei, en cuantes qu'esta nun recueye nos oxetivos de la TV qu'esta seya "elementu clave" na promoción, recuperación y normalización de la llingua asturiana

De la que la Xunta Xeneral del Principáu llamó a consulta a estes instituciones pa pregunta-yos los criterios que recomendaben p'asegurar la presencia del asturianu na TV viose que ente los que defendíen l'asturianu nun había un criteriu apautáu sobre como tenía d'emplegase la llingua na TV. Esta falta d'alcuerdu tornó n'entendimientu ayeri pa dicir que l'asturianu tendría de ser llingua "vehicular" na futura TV, en cuantes qu'esa ye la manera d'asegurar que se respeten los derechos de los falantes d'asturianu, que nun tienen una canal que-yos fale nel idioma d'ellos cuando por contra toles demás canales son en castellanu. Cara a que l'ente autonómicu trabaye bien el tema idiomáticu, pidióse qu'haya una planificación idiomática al través d'un gabinete alxuntu que s'encargue d'afitar criterios y de la formación del personal.


A la rueda de prensa asistió José Luis Bron, presidente de l'Asociación de Periodistes, que dixo que la entidá que representa nun tien un criteriu nel tema llingüísticu, pero aprovechó la convocatoria de les entidaes citaes enriba pa dicir que se sentíen defraudaos pol gobiernu asturianu, que-yos prometiere va tiempu representación en conseyu d'alministración a los profesionales.