Piden protección pa tola Ría d'Avilés

Los colectivos naturalistes del país siguen pidiéndo-y al Principáu qu'enanche la llista de llugares que l'executivu asturianu va solicitar a la UE qu'amieste a la rede europea "Natura 2000" de Llugares d'Interés Comunitariu o LIC's. Si va poco la Sociedá Ornitolóxica pidía que s'enxertare na solicitú a presentar énte la UE la costa de llanes como espaciu a guardar, agora ye'l Colectivu Ecoloxista d'Avilés el que pide tamién cambeos na propuesta.



La solicitú del grupu avilesín espeya la entrada na rede europea de la parte de la Ría d'Avilés que quedaría fuera de la llista de llugares presentada pol Principáu. Ello ye qu'anque parte de la Ría (Zeluán y Llodero) ye monumentu natural del Principáu, el colectivu entiende qu'hai llugares na Ría d'Avilés que merecen protección, apuntando pa la parte que queda talamente enfrente de la rula avilesina en cuantes que ye zona de pasu d'aves migratories y d'añeramientu d'otres munches y esistiendo amás nella dos especies vexetales Salicornia y Sarcocornia, protexíes pol Principáu coles catalogaciones de "mui rara" y "vulnerable". La parte de Maqua que ta xunta la depuradora tamién merecería entrar na declaración pa poder recuperar la marisma que se perdió naquel llugar (la declaración como LIC lleva arreyaes llinies de financiación propies pa estos oxetivos). El colectivu ecoloxista avilesín sorraya tamién que la vexetación halófilo del llugar ye enforma interesante, contando la Ría con 5 especies protexíes que yá sufrieron munchu dañu por culpa de les campañes de draga na ría.