Piden nueve meses de cárcel a dos mineros acusaos de llevantar una barricada en setiembre del 2010

|

La Fiscalía d’Asturies solicita una pena de nueve meses de cárcel a dos mineros por formar parte d’un piquete que llevantó una barricada nel 2010. La vista oral va tener llugar esti miércoles, xornada de fuelga nel sector.
 
El Ministeriu Públicu sostiene que, sobre las seis de la tarde del 30 de setiembre del 2010 –un día depués de la fuelga xeneral–, delles persones, ente les que supuestamente taben los acusaos, J. A. R. R. y J. A. P. F., miembros de piquetes del sector mineru colocaron una barricada con neumáticos, a los que prendieron fueu, na carretera N-630 n'El Caleyu (La Ribera) –nel so puntu quilométricu 35, a l’altura de la salida a l’autopista A-66–, col "ánimu d’alterar la pacífica convivencia ciudadana". La barricada obstaculizó la circulación llibre de vehículos y ocasionó daños na vía valoraos en 525,04 euros, según informen dende la Fiscalía, que considera los fechos constitutivos d’un delitu de desórdenes públicos (artículo 557.1 del Códigu Penal) y d’un delitu de daños (263.1), y solicita que se condene a caún de los acusaos a nueve meses de prisión y al pagu d’una multa de 2.700 euros, con responsabilidá personal subsidiaria en casu d’impagu. Amás, reclama que dambos acusaos abonen, de forma conxunta y solidaria, una indemnización al serviciu de Conservación y Esplotación de la Demarcación de Carreteres del Estáu de 525,04 euros.
 
La vista oral ta señalada pa esti miércoles, xornada de fuelga nel sector de la minería, nel Xulgáu de lo Penal númberu cuatro d’Uviéu, a les 11.20 hores. Al igual qu’asocediera la selmana pasada, CC OO y UXT convocaron pal miércoles y el xueves dos xornaes de paru como protesta contra los recortes previstos na minería de carbón que, según señalen los sindicatos, llevaría al desaniciu del sector y condenaría a una muerte llenta a les zones mineres.

Contador Estadistiques