Piden a la CUOTA que pare la obra del Meicín

Depués de les denuncies puestes énte la UE, el Ministeriu de Cultura y el Tribunal Supremu, el principáu decidió seguir alantre cola obra del refuxu del Meicín, ayeri, el Principáu licitaba la obra pa la empresa Alcuba S. A, que tien 11 meses pa facer l'edificiu. Mientres l'alministración da esti nuevu pasu, la Plataforma para la Defensa de Penubina y la Coordinadora Ecoloxista d'Asturies punxeron güei un escritu énte la Comisión d'Urbanismu y Ordenación del Territoriu d'Asturies (CUOTA) pidiéndo-y qu'emita un informe negativu agora que'l proyectu ta a tramitación nel Ayuntamientu de L.lena, que tien que dar la llicencia municipal pa la obra.



La plataforma entiende que la obra valta'l Plan Xeneral d'Ordenación Urbana del conceyu, especialmente les sos normes subsidiaries, qu'apauten que en casu de facese obra en suelu non urbanizable y d'especial protección, les construcciones esistentes tendríen de caltener el so volume. Nesti sentíu, l'artículu 316 d'estes normes subsidiaries tamién diz que l'altura másima en mediu rural ye de dos plantes , mientres que'l proyectu presenta tres pisos. Los materiales emplegaos nel edificiu tampoco nun concasríen cola lletra del PXOU, al dicir de la plataforma.