Peslláu'l programa de Llanes al Cubo

El Conceyu de Llanes vuelva a entamar el festival "Llanes al
Cubo", nesti momentu yá se sabe'l cartel de los conciertos, anque
tovía tan por definir delles actividaes de los trés díes
de festival.



El Conceyu de Llanes fai una apuesta arriesgada na seronda asturiana
entamando trés díes de festival nel mes de ochobre. Esta
época del añu ye arriesgada pa los conciertos al aire llibre,
pero precisamente pola falta d'estos a lo llargo de tol iviernu fai que muncha
xente s'anime a tirar pal oriente d'Asturies pa disfrutar de dalgún de
los conciertos. Con too y con ello, tolos conciertos fáense a techu,
asina que polo menos la lluvia nun ye escusa pa nun dir.



La novedá esti añu no que cinca a los grupos que van tocar
ye que se buscó dalgo de variedá nos estilos. N'años
anteriores la música folk yera la única banda sonora del
festival. Nel festival d'anguaño, amás del folk, tamién
van venir sones dende más al sur con xente como
"Chambao",
"Raimundo Amador" y
"El Bicho" que van tocar el 30
d'ochobre na carpa A a les 22:00 hores.



Con too y con ello, la música folk va siguir siendo la principal
atracción d'esti "Llanes al Cubo". El vienres 29 vamos poder
ver a "Tuenda", el tríu d'Ambás, Pepín de
Muñalén y Elías García na Basílica, y a les
21:00 hores conciertu de
"Tarañu"
na carpa B. Esi mesma nueche pero a les diez y na carpa A van tocar
"Xuacu Amieva", el prestosu grupu estremeñu
"Acetre" y los irlandeses "Altan", banda que nun necesita de
presentación pa los aficionaos al folk atlánticu, la so fama,
cientos de conciertos y los sos diez discos son abonda garantía d'un bon
espectáculu. Al día siguiente sábadu 30, la tarde vien
coles actuaciones del dúu Ivan Drever & Duncan Chisholm,
conocíos por tocar la guitarra y el vigulín na banda escocesa
"Wolfstone", el dúu va tocar a les 19:30 na carpa B, mientres
qu'a les 20:30 va ser "La Bandina'l Tombo" la que toque na
Basílica.



El domingu 31 va acabar esti festival con más música folk.
A les 19:00 hores na carpa B "Deua Dubra" y a les 20:30 hores la
bandina "La Galbana" na basílica. Pela nueche ba carpa A les
bandes que van tocar son "Urban Trad", el grupu belga que se fizo
famosu por quedar segundos nel concursu d'Eurovisión del 2003, los
ingleses "Flook" que yá tuvieron per Asturies pel mes de xunu,
y los asturianos "Felpeyu".