Perspectiva macroeconómica pal 2004

L'añu 2004 entamó con xuba nes principales bolses mundiales. Lloñe d'una corrección de los índices los inversores caltienen l'apueste pola renta variable. Les estadistiques positives d'Estaos Xuníos ayudaron a separtar les duldes qu'enllenaron l'exerciciu mentantu que la recuperanza económica sigue p´alantre según los últimos indicadores. Asina, el selectivu Ibex-35 de Madrid celebró'l fin d´añu con más xuba, medrando nel conxuntu del añu 2003 un 28,16% dempués de tres años de perda.

L´ISM de los xestores de compra norteamericanos foi de 66,2 puntos cuando los analistes contaben con 61 puntos. Con esti datu tan positivu xunta l'importante xorrecimientu económicu de la primer potencia mundial con (PIB penriba´l +7%) la economía d´Estaos Xuníos ta tirando pel enfotu de la comunidá inversora, que ve nel nuevu añu l'aniciu d'otru ciclu d'espardimientu económicu. Ente les bolses del Vieyu Continente destacaron la de Francfort con una xuba del 1,4% mentantu que Llondres trancaba en positivo con un 0,7% y París alrodiu'l 1%. Wall Street tuvo un pieslle mistu na primer xornada del añu col Dow Jones cayendo'l 0,44% y l'índiz tecnolóxicu Nasdaq penriba los 2.000 puntos con una xuba del 0,17%. La tendencia xeneral de los inversores foi recoyer el beneficiu d'estes selmanes.

Na Bolsa de Madrid les xubes del 2003 ficieron un de los meyores finales d'añu dende hai tiempu. L'entamu del añu llevó al Ibex-35 a los 7.879,20 puntos con una xuba del 1,84%. Prisa y Banesto entraron nel selectivu y celebraron la entrada con abultaes xubes. Los blue chips tuvieron un pieslle en positivo cola matriz del Grupu Telefónica como cabezalera con xubes alrodiu'l 3%. Según dellos brokers les xubes d'esti nuevu añu embúrrienles los grandes fondos d'inversión de les aseguradores y los grandes inversores. Ensin dulda l'añu 2004 va ser el de la renta variable. La selmana pasada trancaron tamién en positivo Metrovacesa, Bankinter, SCH, BBVA, Sogecable, Endesa, Iberdrola y baxaron Unión Fenosa. Iberia y Enagás.

Según la xestora Renta 4 les perspectives pal nuevu añu son bones pa la renta variable. Nel ámbitu macroeconómicu la xuba moderada de la inflación y la de los tipos d´interés pol BCE van ser les dos anuncies más importantes. Los analistes de Renta 4 apuesten pon un crecimientu económicu d´Estaos Xuníos y la fín del estancamientu na Zona Euru. Ente los riesgos económicos, Renta 4 apunta como problema a l'infláu mercáu inmobiliariu español y a la xuba del preciu del petróleu. Con too y con ello, Renta 4 diz que l´Ibex va rematar l'añu ente los 8.200 y 8.300 puntos lo que supón una xuba penriba´l 10%. La volatilidá del mercáu y los resultaos empresariales van ser claves pa los operadores bursátiles esti añu qu'entama. Dientro de la cartera modelu que propón esta xestora destaquen l´apueste pol sector bancariu y pol constructor. Xunta estos valores consideren que esti añu los blue chips van recuperar les perdes de los tres annus horribilis que lleven dende la fin de la burbuya tecnolóxica.

D'otra manera, esta selmana baxó'l preciu del petróleu un 3% hasta mangase nos 29,32 dólares barril. Anque les reserves de petróleu nos Estaos Xuníos siguen a la baxa les perspectives del preciu del Barrill Brent son d'aposentar perbaxo la raya de los 30 dólares barril. Nel mercáu de renta fixo los bonos entamaron el añu con una xuba de rentabilidá. Na guerra de les divises, l'euru sigue penriba los 1,20 dólares unidá, anque'l dólar garró fuelgu coles bones estadístiques d´Estaos Xuníos y l'euru quedó perbaxo de la marca de los 1,26 dólares unidá.